عود الحياة إنكسر واختلّ سير الزمان=واللي تبّقى غدى ما بين وجه وقفا
تبقى ظروف الليالي والصعاب امتحان=مهما تعشّمت فيها تظهر اللي خفا
من وجّبته المخوّة بالعلوم السمان=وشلون يرضى تقطّعها يدين الجفا ؟!!
واللي عليه الهقاوي كانت أكبر رهان=أقفّى عقب ما دعى الله فيه ما قلت: أفا
يا طير الاحلام رفرف والله المستعان=ما دام جمر العمر باقي بعد ما طفا
وش عاد تقدر تسوي طاح سرج الحصان=ووش عاد تحفظ لوجهٍ بعد ماه انكفا
عن كل ما في صدور الناس جور وهوان=ومن كل ما فالحياة إحساس يكفي .. وفا
ما عاد باقي للأيام الجميلة مكان=في واقعٍ ما ترك للنفس لحظة صفا
أقصى الأماني ألا (ليته يعود الزمان)=وأدناتها ما يرد الوصل عقب الجفا