هذا الطاروق من حفله جمعت كلاً من مصلح بن عياد وملفي المورقي وحبيب العازمي وهي حفله قديمه جداً


مصلح بن عياد:
سلام يا قومٍ تحل النشايب
يا نعم بالشجعان حاضر وغايب
وأن كان يا ملفي طرى لك عجايب
قدم لي الدعوى على صورتين
أقوم ساعه وأتريّح ساعتين=من ياخذ الأجره يحاسب بالعمل
أذكر مواجهنا على شمّخ النيب
يوم ألتقينا عند عوج العراقيب
عزالله أن ألكم علينا مواجيب
قدم لي الدعوى على صورتين
يا كبر حظك يا جبل بين جبلين=أليا أنتهيت من الجبل صادم جبل

ملفي المورقي:
يا مرحبا ترحيبةٍ تنعش الروح
في منزلٍ بابه مشرّع ومفتوح
للي يجي من ساير الناس ويروح
قدم لي الدعوى على صورتين
السالفه ما عاد فيها أغضاي عين=نبا نشيل الحمل في ظهر الجمل
أي والله أذكر يوم جيتوا وجينا
هذا الخبر في ماضيات السنينا
لكن حنا فالواقف ثنينا
قدم لي الدعوى على صورتين
حنا نضد القوم بالجنب المتين=أن كان تدري ويش صار وش حصل

مصلح بن عياد:
ويش أنت قايل يوم قلتوا وقلنا
نهار ودينا المراجل لا أهلنا
أليا زعلت من الحقيقه زعلنا
قدم لي الدعوى على صورتين
خنذف ليا نادى المنادي حاضرين=أليا وصل صفك ترى صفي وصل
أليا نويت أقول ياما وياما
خايف على العتبان نقرا السلاما
والفارس اللي فوق متنه وساما
قدم لي الدعوى على صورتين
يالله يا رب الثلاثه والثنين=يا رب ملفي لا يموت من الزعل

ملفي المورقي:
أذكر كلام دليم فالشيخ مقبول
طريحنا منكم نشيله ليا الحول
وطريحكم منا بالاكفان مشيول
قدم لي الدعوى على صورتين
حنا عتيبه من قديمات السنين=كم واحدٍ للي وصلنا ما وصل
يالحارثي ياللي تفتل شواربك
قدم الحساب الصعب والله لا أحاسبك
أشوف تال الوقت هبت هبايبك
قدم لي الدعوى على صورتين
الحمد لله سالمين وغانمين=أمن المشاكل والتخلف والجهل

مصلح بن عياد:
اللي يعرّض غبة الهوش صدره
ما هو سواة اللي يلقيه ظهره
ياللي خذينا فيك ورده وصدره
قدم لي الدعوى على صورتين
حنا الشلاوى ننطح الجمع الرزين=جيناك ياللي من ورى الواد الفحل
دليم هو وسحيم مثل الخواني
يوم أن عشر القوم راحت ثماني
ويش أنت خابر يوم ذاك المكاني
قدم لي الدعوى على صورتين
ودي نحدك حد يالجنب المتين=صرف الذهب ما هو كما صرف الهلل

ملفي المورقي:
جيتوا لا كنّا حظنا فوقكم قام
حنا ربطنا شيخكم عشرة أيام
تشهد لنا شمر وقحطان مع يام
قدم لي الدعوى على صورتين
الله يشهد والخلايق شاهدين=يالحارثي طقيت بابك وأنقفل
أربع ليال مخيمٍ فوق مانا
يشب ناره عندنا ما أحتسانا
ما يدري أنه طايحٍ في يدانا
قدم لي الدعوى على صورتين
لو نصنا هاك الليالي غايبين=اللي حضر بالسيف والشلفا فعل

مصلح بن عياد:
يوم أختلط عج المقابيس وأبليس
الله يعوضك في قطيع الخراريص
ياللي معك نوماس عندي نواميس
قدم لي الدعوى على صورتين
ما تنقبلك دعواك غير بصورتين=يكتب لك القاضي على كاتب عدل
الشيخ عندك والدبش روحوا به
يوم أن أخو سكرى يحسب ذنوبه
عقوبةٍ يا كبرها من عقوبه
قدم لي الدعوى على صورتين
الشيخ يا ملفي على سمن وسمين=واللي يصوبكم عجل ياصل عجل

ملفي المورقي:
ياللي تنومس يوم حصلت حاشي
الناس ما تحسب حساب المواشي
شيخك محجز فوق حيد الفراشي
قدم لي الدعوى على صورتين
ــــــــــــــــــــــــــــــــــــــــــــــــــ ـــــــــــ=ــــــــــــــــــــــــــــــــــــــ ـــــــــــ
يالو دليم الطر زينٍ سلاحه
لا واصباح الحارثي واصباحه
والله ليومي به ويكسر جناحه
قدم لي الدعوى على صورتين
غزيت والعتبان فيهم طامعين=لكن نتفّ ريشكم مثل الحجل

مصلح بن عياد:
الشيخ جاكم ضيف ماهو بمجبور
لا ميتٍ يقبر ولا عظم مشقور
مقبول أخو حمده ليا غوّر الغور
قدم لي الدعوى على صورتين
يا راسك اللي راح أدق من الطحين=كب العسر وأدرج من الدرب السهل
آلاد شدادٍ وآلاد الحطيبي
أسلاحهم يوم الملاقا يصيبي
يطيب لك وآلا على غير طيبي
قدم لي الدعوى على صورتين
الله من يومٍ يروع الغافلين=نقلط على المرعي تقول أنه همل

ملفي المورقي:
لا والله آلا جاء معصب وغازي
وجماعته كلٍ برمحه ينازي
ذابحته الحنطه وبر الحجازي
قدم لي الدعوى على صورتين
لكن ردوهم عتيبه مفلسين=على النقا ما فيه غدر ولا ختل
ماذمكم من ماضيات الليالي
لكن حنا مثل صم الجبالي
معنا كثير الناس ماله مجالي
قدم لي الدعوى على صورتين
حنا نبا نعلمك بالعلم اليقين=ما عندنا فالمعركه سمن وعسل