ما كل من قال المثايل فعلها = ولا كل من شال التفق صار تفاق
ولا تنبدي الشكوى على غير أهلها = ولا ينزرع زرعٍ على شال مطراق
ولا كل من عمر بيوتٍ نزلها = ولا كل طيرٍ لأبرق الريش لحاق
ولا كل من هام المراجل فتلها = ولا كل من شد الدركسون سواق
وجبالها ماهي بتشبه سهلها = ولا كل سيفٍ بالمحاظير فتاق
ولا تستوي عقبانها مع حجلها = ولا كل رجالٍ على الطيب مشفاق
وشخوص القبايل ما تساوي سفلها = ما بين جمع صفوفهم شت وأفراق
ولا يشبع الحنضل لصافي عسلها = والرمث ما يصلح على الهجن معلاق
والذيب ما يصلح يخاوي ثعلها = ولا كل من يحكي لك القيل صداق
ولأحدٍ يميت النفس قدام أجلها = نفس الفتى والرزق في كف خلاق
والناس دايم ما تخلي جدلها = والكامل الله والمراجل بالأوفاق
دنياك ما يدريبها إلي جهلها = وإلي مجربها للأمرار قد ذاق
دايم على العربان يدرج عجلها = مرٍ عدال ومر فيها تصلفاق
والنفس عالجها بحزة زعلها = بصبرٍ على الشده وتحسين الأخلاق
وأطلب من المعبود يصلح عملها = في ساعةٍ لألتفت الساق بالساق
وصلاة ربي عد مأمطر هللها = على نبياً عد ما لاح براق

وسلامتكم