يالله يا رب العباد اللي لك الأمر المطاع = يالواحد اللي عالم ٍ غيب الليالي والسنين
أبدا بذكره وأستعينه قبل لا أفّل الشراع = عساه يرحمنا ويهدينا دروب الصالحين
دوب أستوى بدع المثايل وأحتمى صدري وفاع = وجتني هواجيس الضماير من يسار ومن يمين
وقمت أتنقّى الزين في سوق المشاري والمباع = وأنا عوايد هاجسي ما يقلط ألا بالسمين
ومن يوم ما قالوا ترى عند الشدادين إجتماع = ما عاد لك شرهه على الأيام يالقلب الحزين
يا راسي أفخر وأنتصب وأرقى النوايف والرفاع = لك عزوة ٍ دايم مواقفهم على الشده تبين
ربعي ليا صاح المصيّح وأرتعد رخو الذراع = يردون حوض الموت ميراد الظمايا الهالكين
بالرمح والسيف الحدب والمارتين إلها لعاع = يثنون في يوم الملاقا دون جرعات الحنين
وعاداتهم ما يذبحون ألا المفادي والشجاع = كم فارس ٍ خلوا هله فوقه يجرون الونين
على جرايرهم يعيش الطير وتعيش السباع = تلقى عشاها عقب مركاض ٍ يشوق الناظرين
وترعابهم سحج العشاير لا نشى الوسمي وماع = ما كفّه الربع الخلاوي لا حدود الرافدين
وإن زارهم ضيف العشاء يلقى الكرامه والشباع = العود والبن اليماني عقبها سمن وسمين
والجار يآمن في ذراهم لا بوار ولا خداع = من دونه الأرواح ترخص كنه بحصن ٍ حصين
فعل ٍ عليه شهود ما قلته خيال ٍ واصطناع = يشهد لهم نجد المسمى والقبايل شاهدين
يالآد شداد أسمعوني والخبر لازم يذاع = تكفون خلوكم على سلم الجدود الأولين
تكاتفوا ترى التكاتف زين والفرقه ضياع = واللي يجنب عن بني عمه خسر دنيا ودين
إليا تصافينا خذينا من ورى الباعين باع = وإليا تفرقنا غدينا عرضة ٍ للشامتين
والرأي نبغى الرأي واحد ما نبي كثر النزاع = نمشي على رأي ٍ سديد وندحم بجنب ٍ متين
ونكحل عيون اللي يخايلنا ورى ذاك الرواع = وجه ٍ بغيض وعادته يفرق خدين ٍ عن خدين
الله ياكم واحد ٍ ودّه تضيق بنا الوساع = قلبه ملاه الحقد ويحاول بنا في كل حين
لكن حنا لا بدا اللازم وشانن الطباع = عاداتنا من دون هيبتنا نهول الهايلين
نثني رقاب القوم والصعبه تجي معنا طواع = وعزومنا لا لان عزم أهل السناوي ما تلين
يالآد شداد أسمعوني والخبر لازم يذاع = تكفون خلوكم على سلم الجدود الأولين
والجاهل اللي ما يميّز في الثنيه والرباع = ما تلحقه شرهة رجال العرف وأنتم خابرين
واللي ليا منّه بدا اللازم تعذّر بالصداع = خلوه يقعد ما ورى كوبان حب ولا طحين
تم الكلام وبارك الله في ليال الإجتماع = وصلى الله وسلم على وجه النبي الهادي الأمين