20 Aug 2014, 08:25 AM
|
|
|
راعي الكيف
علوش ينقد فنجان القهوة
في مجلس إبن رشيد في برزان
كان ابن رشيد أمير حائل مشهور بالكرم وله مجلس ويجتمع لديه جمع من الناس ما بين أمراء ووجهاء القبائل وكذلك الشعراء وكان مجلس ابن رشيد كأي مجلس من مجالس الشيوخ والأمراء تدار فيه القهوة العربية وهناك أشخاص مكلفون باعداد القهوة وترتيب الدلال .
وفي يوم من الأيام كان في ضيافة ابن رشيد علوش بن ظويهر وعنده خبرة ومعرفة دقيقة بالقهوة ويعرف عيوبها اذا كانت هناك عيوب من مجرد الشم والذوق ويعرف حمستها أهي محترقة أم نية، ويعرف اذا هجرت الدلال ويعرف طعم القهوة اذا تغيرت بأي شيء ويوم طلب ابن رشيد القهوة للمجلس أتى الذين يصبون القهوة وصبوا فنجال للأمير وبدوا بالضيوف ويوم عطوا علوش الفنجان وجاء يشرب منه شوي وتبين ان في القهوة شي ومتغير طعمها بسببه نزل الفنجان كأنها حركة غير مقصودة ابن رشيد انتبه لعلوش وكلمه بلهجة شمر وأهل حايل: ليه ياعلوش سيحت الفنجان قهوتنا بها شين؟ قال: قال: يا الامير القهوة صايدة قال: وش هي صايدة؟ قال علوش: صايدة أبو عوف فقال ابن رشيد اللي حوله: يالربع انت متطعمين في القهوة شيء قالوا: ابد القهوة مآبها شي فقام علوش متحديا وقال: اذا ما صارت القهوة صايدة لكم رقبتي واذبحوني واطلب منك ان تعفي عن راع القهوة فقال بن رشيد: نادوا راعي القهوة و جاء اليه راع القهوة و قال له: يقول علوش ان القهوة صايدة ونبيك تجيب الخمرة نشوف هذا صادق والا لا والخمرة هي الدلة الكبيرة اللي تلقم فيها القهوة
جابوا الخمرة وحطوا شوي ليف وكبوا عليه «حثل القهوة» علشان ينشخل وأخذوا يحركونها الين لقوا ابو عوف انبهر ابن رشيد وقال لراعي الضيافة خل علوش يقعد عندنا عشرة ايام وصار علوش يقعد في صدر المجلس وابن رشيد ناوي يختبره ويتأكد من معرفته وقال لراعي القهوة اذا جاء باكر المغرب حط ورقة (عرفـج) في القهوة ويوم صبوا القهوة قال ابن رشيد ترى الدلال منظفينها عقب أبوعوف تطعم بها شيء اليوم فقال: قهوتكم بها ريحه عرفج وفي اليوم الثاني وضعوا بها: كسرة مسواك وعرفها وكل ما حطوا شي عرفة قال ابن رشيد لراعي القهوة: اخلط بن مستوية وبن ني وصبوا لعلوش قال: هاه يا علوش تطعم بها شي قال: ايه فيها حمسة محترقة وحمسة نية وتيقن ابن رشيد ان علوش داهية وخبير في القهوة وأكرمه غاية الاكرام وقال الذويبي هذه القصيدة:
تستاهل الكيف الحمر يا بن وايل ... أنت الذي تستاهل الكيـف كلـه
يللي نقدته وسط ديـوان حايـل ... لولاك يا علوش محدن فطن له
بدلال من يجعد صقا كل عايـل ... الضيغمي ريف اليديـن المقلـة
الضيغمي مردا المهار الأصايـل ... يا ما أنقطع بساقته من سجلـه
يا بن ظويهر ما بها قول قايـل ... تستاهل الفنجان لا جـا محلـه
يا ناقد الـدلال بحكـم الدلايـل ... يا ريف هجن والمزاهب مقلـة
ربعك بني وايل مجـاز القبايـل ... أهل الجموع الراسية والمظلـة
زبن الدخيل اللي توطـاه طايـل ... الجمع دونه والرمك مردف لـه
|