حياك الله يابو عناد ..
والمنتدى منتداك بلا شك .. وأعذرني أنا مشغول
ومبتعد عن النت وعن الشعر .. ولكن وجودك اليوم
أستدعى تواجدي للترحيب بصديق مثلك ومجارات
قصيدتك ..
يامرحبا يالصاحب اللي جيت بعلوم الرجال
...................................في حلةٍ شوف الرجال يسرها ويشوقها
أقلط على زين النبا وأقط على صفوة دلال
................................ماذاقوا أهل الكيف نيتها ولا محروقها
من بعدها سج الخطا وأنهج على مبدا الهلال
..............................وأحذر من اللي يعترض درب القدم ويعوقها
خل أحتمالات البشر .. ماكل مايعرف يقال
...............................أحدٍ قصر عن هقوته وأحدٍ تعدى فوقها
وأنته من اللي معرفتهم تاج راس و راس مال
..............................خويهم مامون .. من نقض العهود وبوقها
لكن ليتك جيت يالحربي قبل وقت الزوال
...................................تاخذ نهارك باوله والشمس وقت شروقها
يا صاحبي وأن غنت الورقى على عود الهدال
......................................أحذر يشدك لحنها وأحذر يشدك طوقها
هيا معي نبدى على روس المشاريف الطوال
.........................................لامن رقينا في مراقيها تبين فروقها
هيجن ليا هيجنت ..وأن لا ليت بالطاروق لال
.....................................نطرق طروقٍ ماطرق شيخ الطروق طروقها
والشجرة اللي طلعها طيب وساقيها زلال
....................................قدام تقطع جذرها لد النظر لعذوقها
الشيخ فالفتوى يقول :أثمارها توكل حلال
...............................وان كان عندك شك في فتوى المشايخ !! ذوقها
جتني قوافيها كذا ... رغبة وطاعة وأمتثال
.................................حرام ما أثنيها ولا اغني على طاروقها