تكاملت منظر الخضره على ماها=ثم اكملت عقب جانا النزل عصريه
بديارنا اللي عجزت القا حلاياها=اغيب عنها وتجبرني على الجيه
نشتاق للبر والطلعات نهواها=مع شبة السمر والديره تبوكيه
ريح الرياحين يزهاني ويزهاها=والوقت حزة عصير وشمسها حيه
في عارض للذياب وجرت عواها=وغطت زهور الوسم ظلعه وواديّه
الضرف بلجيك والبندق نقلناها=والجيب صالون والشمعات غازيه
بنزيمنا فل والعزبه قضيناها=والخط سيدين للروحه وللجيه
انطيح ونقوم فالدنيا ونقراها=وانترجم الحال والاحلام ورديه
اتروح هذي كذا وتطيح بسواها=ويراوح الحال بين الشمس والفيه
على ضفاف العمر رحله شقيناها=ونجول والنفس ماموره ومنهيه
ربعي بني الحارث الجزله بملفاها=ملفا التباشير للاجواد مقنيه
وهذي عتيبه لهم قصه وفحواها=بني عمومه لهم قاله وماريه
ونعم بزهران قوم زان مبداها=صحايف بيض والقيفان مبنيه
واماالبقوم وسبيع الله يرعاها=اهل الشهامه وبالوقفات معنيه
وانعم بقحطان قوم تحمي حماها=على شفاها بدا القرقاح رديه
وشمر تشمر عن اليمنى بيسراها=سلايل حاتميات وطائيه
وان جات عند عنزه قصه ومعناها=سلم على ال السعود وعزها ليه
والا ليا جت مطير البيض تغشاها=حمر النواظر ونزعتها شموليه
وحرب وجهينه مسيره في ثناياها=اصالة اجداد وسلالات منقيه
ويام العريقه من اقصاها إلى اقصاها=ربع حلام وكرام ونارهم حيه
وهذي بلي وان نسينا ما نسيناها=اليا سرت للوازم جات جبريه
وان جات للساحل الغربي مشيناها=من سد جازان للدره شماليه
كل القبايل نقدرها ونتباها=ياشعب ما اضن في ذا الكون جا زيه
من عهد الاسلاف لين اليوم ملقاها=على الثوابت وللازمان دوريه
شعب نجله وديره ما شنيناها=والله يسقي ترابك يالسعوديه