سلام من دافع وفـاء قلـب ولسـان=ياللي كسبت الطيـب طبـع وهيبـه
ياللـي محلـك للمشاكيـل ديـوان=ما يدهلـه غيـر الرجـال الأديبـه
ولك مع رجال العرف منهج وميـدان=ومن لا تبنـا المرجلـه مـا دريبـه
يا بن شجاع اللي على بدر شرهـان=تسمـع المـعـذار وش يبتديـبـه
والله مـا صديـت جفـوا وهجـران=ولاني بمن يسهج صداقـة صحيبـه
سبة غيابي يعلمـه عالـي الشـان=عـلام مكنـون الضمايـر وغيبـه
اللي حصلي لو بغيـت اجحـده بـان=شـئ يشـاف وش مـا يندريـبـه
شفت الحليف اللي معاصر حميـدان=وابن جعيثـن شـاف منـه الغليبـه
اللي يخلـي وافـي البـاع جابـان=لو هو رجل في كـل حـال تعديبـه
لا عاكسه راحت مساعيـه مجـان=وحده على التقصير لـو ما رضيبـه
اشوف له في بعض الأشخاص نيشان=وليا قصر شبح الفتـى بـان عيبـه
يرسل عليه من السلاطيـن سلطـان=فـض غليـض وقاسـي يندعيبـه
يفتح على وضع المحاويـج بيبـان=وما حل بأحوال الفتى مـن نصيبـه
ماله عن المقسوم ملجـا ومزبـان=إلا علـى رب الخلايـق حسيـبـه
لو ضاق صدر اللي مباريه كسـلان=يرضى القدر برضـاه والا غصيبـه
يا ما ويا ما من طويليـن الأيمـان=اللي لهـم بالطيـب طبـع وذهيبـه
اللي ليا من الـردي خاطـره شـان=يـذري ذراهـم بالليـال الصعيبـه
ولهم على الجـودا مواريـث جـدان=والرجل من طيب المجاذيـب طيبـه
والرزق عند اللي ليا قال كـن كـان=ولا خلـقٍ الا خالـقـه معتنيـبـه
هذي ظروفي يـا سلايـل كحيـلان=اشـوم للجـال المـلاوح واهيـبـه
وانته رجل عقلـك دليلـك وميـزان=والعارفـه راع النـظـر يقتديـبـه
اشرح لك المعذار من قلـب ولهـان=ولا مقصدي تـردف لخطـي نجيبـه
لو كان صدرك يدحـم فيـه بركـان=وعليك مـا فتـل المعانـي صعيبـه
ولك بالجواب الزين مقدور وامكـان=وطرايـف عنـد النشامـا عجيبـه
وعندي مناظيمك جواهـر ومرجـان=وبحـرك سبـاح البحـور يغديـبـه
غبة بحر ما انته ضحاضيح غـدران=لا خضـة السبـاح طلـع سريبـه
ساني ومسني يا السنافـي بليهـان=ومسن من عرض الجمـال المنيبـه
حكمي على عرفي ولانيـب غلطـان=انك حملـت مـن المعرفـه حقيبـه
ولا قول ماغيرك من الناس فهمـان=كم شاعـرٍ ينقـض معانـي لعيبـه
والشعر مبني له قواعـد وسيسـان=ماهوب هـرج مـن بغـاه يهذيبـه
الشعر فقـد ونقـد معنـى ومليـان=مثل الهـدف ماكـل رامـي يصيبـه
ماهوب كثر وقـل تلفيـق والحـان=تفـرق معانيـه العقـول اللبيـبـه
قـد قالهـا حـام الونيـات راكـان=القيل يكفـي عـن كثيـره مصيبـه
الفرق بالمعقـول والـزود نقصـان=وغيب الضماير مطلـع بـه رقيبـه
قلتـه مثـل والا فـلانـي بـديـان=ولا ضاع حق ليـا ادعيـت ادعيبـه
مالي هدف قلت المثايل على شـان=اقنع صديقٍ شـاف طـول المغيبـه
حيث الثقه بيني وبينه لهـا اركـان=على نقـا واخـلاص مافيـه ريبـه
لو لا الثقه ماصاروا الناس صدقـان=ولا صـارت الـدار البعيـده قريبـه
تمت وصلى الله على نسـل عدنـان=نبينـا الـلـي دينـنـا يهتديـبـه

البارحه ما طبـق الجفـن سهـران=وعيني غدت للنوم مثـل الحريبـه
ماهو زعل لا شك راضي ومشتـان=أفرح بمرسـول الرجـال الرتيبـه
قول الأديب اللـي يطـري حميـدان=اللي لنـا جـاب الرسالـه نجيبـه
يا مرحبا ترحيب مشفـق لشفقـان=مرسـال بيطـار القوافـي طبيبـه
عداد ما يمطـر علـى القـاع ودان=ومازاف نبت بالفيـاض الخصيبـه
بمرسول من صاغ القوافي با الإتقان=اختار من زيـن الزهـور الذويبـه
عن طلعة المرقاب ماهوب عجـزان=وافـي ويستافـي ويوفـي طليبـه
يرسي كما يرسي على القاع عرنان=حيث الجبـل ماكـل شـئ يجيبـه
يا بدر انا في سابق الوقت شرهـان=وعادتك تشتـال الحمـول التعيبـه
اشره على مثلك واسامح ليـا بـان=عـذر صحيـحٍ واضـحٍ نكتفيـبـه
والا الردي لو هف هفـة قهيـدان=اللـي عتابـه للـردي مـا يثيبـه
ماني من اللي يدخله شـك رغبـان=ومنحا شعيبي مقفي عـن شعيبـه
ما نتخذ من هاك الأجناس صحبـان=ولا بيع في سوق الردى واشتريبـه
أنا مع الطيب علـى مـر الأزمـان=شـرواك مـن للطايـلات نغزيبـه
هذا وانا لـه كـل الايـام منـدان=راع الوفـاء لـه واجـبٍ ينجزيبـه
حيث ان له في صفحة المجد عنوان=حـرٍ مربّـه نايـفـات الجذيـبـه
يا بدر منك الذنـب يجـزا بغفـران=والعذر يقبـل منـك قبـل تحكيبـه
ياجب يجازى راع الإحسان بحسان=ومبنى الصداقه ما يجـوز إتخريبـه
ما يختفي يا بدر عن علم الإنسـان=الله عن المنصاب يجلـى المصيبـه
هـو الـذي للعبـد حنـان منـان=اللي صغار النمـل يسمـع دبيبـه
سبحان رفـاع السمـوات سبحـان=منجي العباد مـن الليـال الرهيبـه
نرجي منه يا بدر رحمه وسمحـان=في وقت ساعاتٍ شـداد وعصيبـه
والا طويل الوقـت لـو زان خـوان=سقي المراره عقب صافـي حليبـه
تلـون الدنيـا علـى عـدة ألـوان=وتبـدل المشـي الهويـن بهذيبـه
كفاك ربي شرها يـا بـو سلمـان=وشر المصايب والوجيـه الغضيبـه
الله يكافينـا سبـب كـل شيطـان=نستعصـم الله بالحبـال القطيـبـه
يا بدر ما انتـه للتماثيـل جوعـان=ليا جيت بالمرمى كسرت الضريبـه
لاشـك خطـك مانخليـه مـجـان=مردود مكتـوب الوفـي نشتقيبـه
نبـي ليـا جـا للرياجيـل ديـوان=وقتٍ بـه المذهـب يـدوّر ذهيبـه
صار المجال وقالوا فـلان وفـلان=وسالوا عن امثال الرجال العجيبـه
تظهر طرايف عند ذربيـن الأيمـان=مثـل المثـل راع النظـر يقتديبـه
يا بعد فرق الفجر عن ضوح فجران=والبدر في وقـت الدجـى ينسريبـه
يا بدر سامحني ترى الفكـر تعبـان=فـلاح زرع مـا يفاخـت ركيبـه
بلشت بالعمال صاحـي ومرضـان=واصبح عزيبي مقفيٍ عـن عزيبـه
الشعر عنـي راحـلٍ يـم نجـران=حتى الذي تطريـه هـو والحقيبـه
لاشك سامحني ليا صـار نقصـان=الموجب ان الشعـر كلـش يعيبـه
يوم انت من ربعٍ على الخيل ظفران=مجرب من روس حـرب الحريبـه
من لابةٍ بالكون تروي شبا الـزان=سقم المعادي فـي نهـار الحطيبـه
هذا ومن عندي لما قلـت ختمـان=ما غرد القمـري بـراس العسيبـه
على نبي خصـه الله بـا الإحسـان=نبينـا اللـي بالـهـدى نقتديبه