قامت هواجيس الضمايـر تستديـر=على عواتق جن حرفـي وظهـره
وهلل براق الشعر واعلنت النفيـر=ماعاد هي لحيـة مقـال وخاطـره
اليا فتلت البيت وأقرع صوت زيـر=يطيح من روس الشياطين عشـره
لحظات وافرد ريش جنحاني وأطير=الجـو يغرينـي سحابـه ومطـره
ناصي سنام المجد والبيـت الكبيـر=الشكر للي عـز ساسـه وعمـره
واصبح لنجم سهيل والجوزا قطيـر=دق الوتد فوق السحـاب وجـاوره
سلطان..صيّر شئ لايمكن يصيـر=ربط قديـم أمجـاد قـوم بحاظـره
مامات حـى ولانـدم فعّـال خيـر=الله عــزه بالمـعـزه ونـصـره
يامنتـدى شـداد يامجلـس أميـر=ياقشعـري ياحارثـي يامفـخـره
عامين مرت وأنـت للعليـا سفيـر=واليوم عيـدك.. والكـرام موقـره
ياسيف جردك المؤسس من جفيـر=يالـب علـم الغانميـن وجوهـره
يلوذ بك مجـد الرجـال ويستجيـر=وكلٍ من العـراف معطيـك نحـره
على خطاك نسير ونحـث المسيـر=ونشد عضـد الميمنـه والميسـره
جمعتنا في وقـت تحديـد المصيـر=الحي واللي مـن نـزول المقبـره
تاريخ ورجـال وبطـولات ونذيـر=للي نسي واللي غفل عن معشـره
تفوح من يمتـك نسمـات العبيـر=نفحات عودٍ فوق جمـر المبخـره
آداب وأخبارٍ يلـب الهـا الخبيـر=وأجمل بيوت الشعر فيـك مسطّـره
شعر جزاء وبسيس وحمود وزهير=والنابغـة وأبـو نـواس وعنتـره
وراس العرب شاعر ونسّاب ومشير=وشيخٍ بعلمه حط للأصـل شجـره
وأذكر رهاوي وبدوي شعار غيـر=وفق أعترافـات القلـم والمحبـره
في منتدى قدم لنـا الشـئ الكثيـر=يطيب أبه قلـب الغيـور وخاطـره
منبر فكر..يصعد عليـه المستنيـر=اللي ربح ثنتيـن ..دنيـا وآخـره
وأنا تراني فيـه غـرام وخشيـر=(ملفي) طلب غرم الأمير وخاشـره
الشايب اللي منزلـه قمـة عسيـر=(أبـو خليّـه) يالعيـون المبصـره
من حبه افرح له وأغني له وأغيـر=حبه بنـا فـي داخلـي مستعمـره
والناس حامل مسك او نفـاخ كيـر=والصقر مايصغي لصـوت الحمـره
لو حاولوا شقر العصا ما اقول غير=جميع بيبـان الشـرور محاصـره
تنبح كلاب البدو والمركـب يسيـر=والحوت ماعاق أنطـلاق الباخـره
ومن وردوه أهل الشهامه جم بيـر=غلطان لو يرمي بعد روي حجـره
بينت لك بالشعر مكنـون الضميـر=وإن كان في قافي قصور المعـذره