هذه القصيده قالها الشاعر بسيس ابن حديد في بعض مشايخ واعيان اهالي قياء اللي سبقوه الله يرحمهم جميع
يامرحبا عد المطر من مناشيه=ياشاعر جتني بيوته قويه
من يجت وانا اهد في البيت وابنيه=اخاف بعض الناس تنقد عليه
فيصل فقد عمه وكثرت شكاويه=جعله يطيب من الجروح الخفيه
الوقت هذا مايعلم بطاريه=عوايده من يوم بقعا صبيه
الميت اللي مات وشلون نحييه=نرضى بحكم الله وسنة نبيه
مستور جعل الله من النار ينجيه=عسى مقره في الجنان الفضيه
وبيت بلا عمدان ماينقعد فيه=واللي بلا عمدان مافيه فيه
والعد يافيصل حيا من ظواميه=عقب الشراب الزين يبسة دليه
حطو محله واحد من بناخيه=والا عياله كان فيهم حميه
والساس طيب والرياجيل تبنيه=حتى يجيلك من جماعتك زيه
ياخدي اللي دمعة العين تحفيه=تبكي على عاضه ومطلق لديه
ياعاضه اللي ماتبيت نواعيه=جعله شهيد مع الوجيه الرضيه
والحد عقبه منهو اللي بيحميه=منه اليا نشران والمالكيه
ومطلق وسيع الصدر ياجاهل فيه=شيخ وفريض وكلمته منطقيه
شيخان كن الحي ماسيرو فيه=ومستور والرابع محمد عطيه
يالله ياللي بامرك الرزق تعطيه=تخلف على فيصل وتخلف عليه
الموت لاجا صاحبه مايخليه=ينزله من فوق ظهر المطيه
يتل روحه لين تاصل علابيه=ويجرجره حتى تراقل لحيه
سفر الحضاري يوم مسفر يناديه=قال اصبرو وانا بجيكم شويه
وجته المنيه قبل ياخذ مقاضيه=ماشاف اهله ولا كتبله وصيه
ومسفر قعد شهرين واصبح مخاويه=الموت للمخلوق مسرع مجيه
ويبكيه مشروع على الخط بانيه=بين الجبوب وبين وادي عصيه
شفت الحوادث كل طيب تنقيه=ميالة ماتعترف بالخطيه
والموت يبغاله سمين يعشيه=والمعذره كان القصيده رديه
والطيب اللي كل فرض يصليه=وختامها مني سلام وتحيه