ياعين ليه الدمـع يغـرق الخـد ياعيـن =إبن آدم ماتعدل احوالـه دمعـاتٍ سالهـا
لو إن الدمـوع تشفـي قلـوب المحبيـن =كان عيني غدت غيمه والدمـع همالهـا
أنا دخيـل الله ياعيونـي لاعـاد تبكيـن =وفري زخات دمعك تـو ماجـا مجالهـا
أثر راعي المحبه لاغاب غاليـه مسكيـن =تقصف عليه الوسيعه يمانهـا وشمالهـا
لوهو فارسٍ معروف للأقصى والأدنيـن =لوهو يقـص طويـق وديانهـا وجبالهـا
لو هـو إبـن قـرومٍ ونـاسٍ عزيزيـن =لابةٍ بدال هروج فرسانها تشوف أفعالهـا
في المحبه كـل الأوادم شبـه متساويـن =لامعتزي تنفعه عزوته ولامراجل يرقالها
وأنا بلانـي الله بحـب سيـد المزاييـن =بنتٍ عشقت رزانتها وعشقت حتى هبالها
والله إني أتعجب وشلون هذيك من طيـن =سبحان ربٍ خلقها وبالحسن صور جمالها
كامله والكامل الله حتى عذروبهـا زيـن =محظوظ من تعشقه ومحظوظ منهو طالها
من نظرها بعينه تنقلـب فيـه الموازيـن =يقعد بوسط القوايل ويترك براد ضلالهـا
في صوتها بحه تقسـم القلـب نصفيـن =لامن تكلمت ماودي أسمع غيـر جدالهـا
ليتها عندي قريبه وتقضي معاي السنيـن =وأذوق من حمر الشفايا وأشرب زلالهـا
غيرتي عليها عضيمه من دمها بالشرايين =من دقات قلبهـا مـن همسهـا وخيالهـا
وأغار من عبايتها وغطاها وكل الفساتين =وأغار من صحنها لامنها نطحـت فالهـا
وأغار من الكحل فـي عيونهـا الثنتيـن =وأغار لامن تقهوت أغار مـن فنجالهـا
وأغار منها عليها ومن خواتـمٍ باليديـن =والسلسله في نحرهـا يالعنبـو سلسالهـا
وأغار من أهلها لاصاروا معها سامريـن =والله إني أحسد عمامها وأحسد خوالهـا
فـي قلبـي لهـا حـبٍ تعـدا القوانيـن =كلي أنـا فـدوةٍ لعيونهـا كلـي حلالهـا
ياويلي إذا سألت .. تحبني ؟ أقول:ويـن =تضيع علومي حينها وأضيع جواب سؤالها
والله أحبها حبٍ ماشفت مثلـه لهالحيـن =وأموت حين غيابها وأحيا حزة وصالهـا
عساها ترحم القلب وتعطيني من الثميـن =من وقتها ساعه أنشدها كيـف أحوالهـا
وعسى ربي يحرسها من ناسٍ حسوديـن =ناسٍ مثل البساسه تاكـل حتـى عيالهـا