يارب عبدٍ لك منيبٍ وخاضع = يامن له قلوب المصلين خشاع
اغفر لعبدٍ في حرا العفو ،طامع = ماهو لغير ارضاك مشفق وطماع
في ساعةٍ فيها فراق وموادع = فيها ضعيف العبد ، ماله تمناع
دنيا العنا كم في كنفها مواجع = فالبحر من لاله مجاديف وشراع
عبدك بتدبيرك وما شئت قانع = يالله بتدبيرك تصاريف الاسناع
سلام للي له هجوسي تدافع = تشفق على طاريه من كل الانواع
احوفها حوف الذهب فالمصانع = واسمو بها عن كل حاسد وطماع
سلام يالوافي بليا منازع = ياشاعرٍ شعره وصل حد الابداع
وراع الكرم والجود للمجد جامع = ياسيف له بجنوب الاخصام مشلاع
له منهجٍ صادق ولا هو بتابع = لاهل الردى والخبث ماهو بتباع
جيناك يابن فراخ والحظ قابع = في مثبره، لا هو تحرك، ولاطاع
ياخالد الايام صلفه ، تتابع = عيا يتغير ، من على خبرك اوضاع
افزع بجاهك ، فالجميله منافع = لو بس ،دعوة والمخاليق هجاع
الحر له فوق الطويلات ماقع = في روسها ماقد طمن يوم للقاع