إيه صح إن القلوب رهاف والنيه مطـيـــه=بس مايعني إني اخضع لك وتصفالك نوايا
كان فيني طيب قلب وكان عندي حسن نيه=بس لاشفت الأمور،، تكركبت عندي خفايا
كنت مثلك يوم كنتي طيب وقلبي بإيديه =وين ماتبغين اوجه لك من عظامي سرايا
كنت ارحب بك وأهلي ياهلا بك يابنيه =واختصر لك بالدلع والود وارسل لك هدايا
كنت ارسل لك بخور وقرفة(ن) مع ميرميه =وكان من ضمن الهدايا كحل وامشوط ومرايا
كنت أغازلك بقصايد لأني اعرفك بدويه=واكتب أشعاري وأغنيها وأحجي لك حجايا
ويوم جيتي للمدينه صارت علومك رديه=قلت يمكن التطور غير بقلبك خلايا
قلت اغير من اسلوبي صارت البنت حضريه=وصرت استخدم اسلوب جيد ونصه خطايا
وصرت متعلم بعد فتره وأرضيتك عليه=يوم بدلت الشعر بأنغام وألحان وحكايا
صرت أغازلك بحنان وحب وألفاظ نديه=لين صرتي تفرحين إن قلت وش تحت العبايا
صرت أناديك بأماني لين نسيتك رقيه=صرت ألبسك الخواتم والقلايد والحلايا
صرتي تقولي هون،، وأول تقولين هنيه=صرتي تقولي ياي،،، أول علامي وش بلايا
بس ياشين الدلع لازاد عن حده شويه =ودها تسوي جراحه ليه،،، بتشيل الكوايا
نعنبوها كل شبر في جسدها فيه كيه=ماسلم من جسمها إلا وجهها صابه شظايا
ويش أسوي ياعرب ربي بلاني بها البليه=تعبتني وأمرضتني بعد ماكانت دوايا
لا وتسألني حبيبي ماكأني مغربيه،،=قلت إلا،،، بس زدتي عنهم بزين السجايا
أعذروني يالربع يومني حبيت قرويه=غرني البرقع وغرتني بها بعض المزايا
اعجبتني يوم كانت بالهوا جداً غبيه=كنت امشيها على كيفي وأسوي لي سوايا
ويوم صارت تكتب وتقرا حروف الأبجديه=إسألوها،، ويش عندك من أمور ومن خفايا،
تذكرون البنت ذيك اليوم صارت جامعيه =لا،،، بتقدير إمتياز من البدايا للنهايا
بس فيها بس فيها بس فيها جاذبيه=كل ماقررت ابتركها تذكرت المزايا