اليـوم ما فـي الأستراحة مساييـر=عـــزي لحالتــها وعـــزّي لحالــي
ظلّت مقـر للوجيّــه المسافيــر=واليوم مجلسـها من الناس خالـي
هلت دمـوعي فوق خــدي مزابيـر=والدمع من عيني على الخد سالـي
دمـــوع عيني كنــها جمـــة البيــر=قامـت تسابق مثل وبـل الخيالــي
هـذي مواريد وهـاذي مصاديـر=إليّـــا ذكــرنا مـــاضيــات الليالــي
يا سفـر يا عيـد الّركـــاب المعاييـــر=كســاب قولـة نعـم بين الرجالــي
مـن دون ربعـه ما يحـب المعاذيــر=يقـدم على القالة شجيع العيالـي
راعـي الصياني والدلال المباهيــر=هيف السمان اللي شحمها زلالــي
راعـي الوفاء يـوم الليالي معاسيـر=جـار ورفيق ومكسـب وراس مالـي
حان القـدر والأجـل ما فيـه تأخيــر=مرحــوم يا شيخ علومـه جزالـي
من روس ربع ما تحسب المخاسير =ذوي سليــم محتميـــــن التـوالـــي
من عاش في الدنيا يشوف التعازيـر=دنيــا تشـــيب مـا عليــها اتكالـــي
أسبـوع كن الكبـد فيــها مساميــر=صابــر وكـن القلب يصـلاه صالـي
دايــم تـورينا العبــر والمناكيــــر=كم فرقـــت ما بين غالي وغالـي
دنيـاك هـاذي يا البنـادم تعابيـــر=يا سرعــها تميـل مثل الظلالــي
إن ناحرت منها نشوف التباشيـر=وان ادبرت منها نشوف الهوالـي
بسنونها تاكل سوات المناشيـــر=لو كـان تضحك تاليتها الزوالــي
الموت سنة ما على الموت تفريـر=ولا مات رجل مخر له عيالــي
البيت عامــر والنشــامى مناعيـــر=وتاريخــهم يبقـى سنـين طوالــي
عمانكم مثل السيوف السواطيــر=وخــوالكم يـروون حــد السلالــي
يصخرون الخصم بالغصب تصخيـر=ويشرب من العلقم شراب زلالـي
عسى لهم مـن والي العرش تيسيــر=واقبـــل دعــانا يا رفيـــع الجلالــي