البارحه يوم كلٍ نام=النوم عن عيني إنحاشي
مدري علامي عجزت أنام=وفكري مشوش ومنداشي
وأذن صلاة الفجر وآقام=وآنا آتقلب على فراشي
كني صويبٍ كسير عظام=راميه خصمه برشاشي
ولاّ سجين وعليه إعدام=ومظلوم ومن القهر طاشي
وأسباب هذا يابو عزّام=ريمٍ للاذهان لباشي
ريمٍ صدفته بسوق أسدام=ومن شوفتي عقلي إنداشي
صغير سن ورشيق قوام=عفري وحجانه عكاشي
أرقّ من لبّة الشمام=وأبيض من القطن والشاشي
مطنوخةٍ من بنات الشام=مزيونةٍ تربش إرباشي
الأم هيفا وابوه هشام=والاسم آمال الدمرداشي
دلوع بابا حبيب المام=وجميع مايطلبه ماشي
مايلبس إلاّ قصير أكمام=حرير مايلبس قماشي
زين الحضاره عليه وسام=وعليه فن الدلع غاشي
يحرم ماعمره سكن بخيام=ولاصنادق ولاعشاشي
ويحرم ماعمره سرح بأغنام=ولا داج في شبك الادباشي
ولاحط شيله ولبس لثام=ولا اوجع رجوله بمنقاشي
ولاشق خشمه وحط زمام=ولاقام يدفي له عراشي
وعليه قلبي يصيح هيام=ودمعي تقول إنه رشاشي
وياجعل من لامني ينلام=ويبطي منوم بالانعاشي