28 Sep 2017, 12:02 AM
|
|
يقولون : راع الفعل دايم قليّل هرج
.
بعد التحيه والسلام ،،،
عربون وصل بعد الغياب ..
بليت الصبر والهم ف . النفس وضعه حرج=وسقت الركايب لين قطّعتها الفرجه
كسرت القيود بعزم ماهو بهرج ومرج=وجت بالشحم زرفالة الوقت مندرجه
توافيق ربّي فتّحت لي وساع الفرِج=ولو حظي المبروك في مشيته عرجه
يقولون : راع الفعل دايم قليّل هرج=وأنا أقول : خل الحكم ل . الساعه الحرجه
توجّه لـ ربك لا تضايقت وإدعه وإرِج=يزيل الهموم وضيقة الحال منفرجه
تواصلك مجاني بدون إشتراك وبرج=ومن يمّك الإرسال لا ينقطع دَرِجه
لغير الله المعبود خل الخطاوي دَرج=ولا تاخذ الموضوع من طارف الهرجه
وإلى من حفظك الله بحفظه لسان وفرج=لا تضحك بخلق الله وتصبح لهم فرجه
رماح المصايب فالمعافين تزرج زرج=ولا عنَّها تقيا ليا جتك منعرجه
(ودام الأمر والحكم لله ف . إدعه وإرج)=يزيل الهموم وضيقة الحال منفرجه
فهد سفر
توقيع : فهد سفر | ياللي عيونك سواة الغاسق اليا وقب
احتار فيها السواد وضاع في لونها
الحاضر الملتهب .. والمقبل المرتقب
خلا العشاشيق فيك تلدّ بعيونها |
|