ياعلها لك سفيره كـان نـاوي الرحيـل=أرحل ولاتلتفت لي عقـب شـد الرحـال
تلقى بدالي .. وأنا بلقـى بدالـك بديـل=وإن جيت ناوي تعود أقول هـذا محـال
حتى ولوجيت تبكي مـن فراقـي عليـل=إن عدت تحـرم عليـه لبستـي للعقـال
وفر دموعـك نصيحـه مايفيـد العويـل=ولاتحلم برجعتي حتى ولو فـي الخيـال
ولاتفرح إن صار ليلي في غيابك طويـل=عودت عيني على سهر الليـال الطـوال
كلي صلابه وعزم .. ولا أعرف المستحيل=وريث حب التحدي مـن عمـام وخـوال
علمني المرجله والصبر .. عـودٍ جليـل=وفهمني إن الصبر .. ميزه تخص الرجال
أشيل حملي ولا أشكي منه لوهـو ثقيـل=عودت كتفي على شيل الحمـول الثقـال
قالوا لي إنك حلو وقالوا لي إنـك جميـل=وأنا بعد شايفك رايـع .. بديـع الجمـال
مصيبتك ماتحس .. وبالمشاعـر بخيـل=دخيل ربك متي بتحس يابـن الحـلال ؟
غرورك أعماك يالمترف .. وعندي دليـل=وحقيقة العلم .. ماتشبـه لقولـة يقـال
ورغم الحلا والجمال .. ورغم ذاك الجديل=أرحل ولاتلتفت لي عقـب شـد الرحـال