بسم من لاحول ولا قوةٍ الا به=العزيز اللي يعز بقوته وبجوده
استجيره من سخط بطشه ومن عذابه=واطلبه عفوه نهار الساعه الموعوده
يوم لاظلٍ ظليل الا لمن يشاء به=يوم من هوله تشيب الطفله المولوده
لو تصك ابوب غيره ماتصك ابوابه=الثنا والشكر له وإرادته محموده
استعزي ياهجوس الشاعر الجذابه=وابدعي جزل الكلام وجنبي منقوده
لا طرقت الشعر ادور ندّره وعذابه=واتخير في طواريقه وعذب بنوده
في ضميري جرح ماضي مايطيب مصابه=اشتكي ضيمه واعاني حسرته ولهوده
والحق الوقت الجروح جروح وابرز نابه=الزمان اللي على بيضه تغطي سوده
امس جاني علم فأجاني به اللي جابه=الخبر حطم كياني يوم جاء مردوده
ماقدرت انشد بعد ماصار ويش اسبابه=علم جعل اللي جرى بامره لنا مايعوده
الفقيد ابن محيميد العلم بأدابه=القدر حكمه كذا واعمارنا محدوده
احسن الله العزاء يامن بكيت غيابه=للقبيلة والقرابه والاهل مقصوده
والعزاء يوصل لعشاق الشعر واصحابه=كم بذل للمعرفه والشعر من مجهوده
كم وقف في ماقفه وقت اللزوم وجابه=وان تعدى الخصم حده رجعه لحدوده
الوفا والطيب لبسه مثل لبس ثيابه=حكمته منها تحل العقده المعقوده
سيفنا اللي نستعز بسلته ونصابه=عدنا اللي بالروى تلقى رهاه وروده
عطر الله قبره ووسع عليه رحابه=وجعله اول روض في الجنه تراب لحوده
ياعسى الوسمي ليا انشى واحتدم سحابه=البروق بمقدمه وارزف ولج رعوده
وانهمر وبله بغزره وانعزل ربابه=الوطى يدرج بسيله والسكون بنوده
بامر ربي مايخيل غير فوق ترابه=اربع وعشرين ليله بالمطر معدوده
لين ينبت حول قبره من جديد اعشابه=يكتسي قبره من ازهار النفل و وروده
مابكيت الا الفقيد اللي نحسب احسابه=يوم بعض الناس لاتفقد ولا مفقوده
الشجيع ابن الشجيع مجرّي الهيابه=الكريم اللي يمينه بالوفا ممدوده
جعل من لا يفقد الطّيب ولا يدرا به=مايزود الا بنقصانه وينقص زوده
السنين من المصايب والكوارث غابه=يومها لاتامنه لو الأمان يسوده
والقضا في حكم من نزل بحق كتابه=والحظيظ اللي من الخشيه يطيل سجوده
المنيه سهم والاسباب ماتتشابه=والسنين تمر وسيوف الخطر مجروده
بامر من لاحول ولا قوة الا به=الثنا والشكر له وإرادته محموده