تبت يدا شعري ليا ما جمل الموقف وتب= لا صار ما يذهل عقول أهل الادب وألبابها
لا صار ما ينساق للواجب ليا منه وجب = والله لا جنب عن بيوت الشعر وأقفل بابها
يا مرحبا ترحيبة توزن مثل وزن الذهب = يرجح بها الميزان وتجمل مقام اصحابها
يا مرحبا يامرحبا من هيض بال ومن طرب=نيابة عن حاضر أبنا الحارث وغيابها
يامرحبا باللي حضر من كل صوب ومن حدب= غالي ولبى دعوة أصحابه قدروأجابها
ويامرحبا بصلب يام أهل الحسب وأهل النسب = وأهل الفعول اللي عداها في الزمان تهابها
عجمان في وقت الملاقا فعلهم يجلا الكرب = أهل السيوف اللي قوي في العدا مضرابها
عاداتهم تنشاف لامن صار للهيجاء لهب= لاطار في ماضي الزمن ستر البني وحجابها
يقولها راكان والتاريخ يشهد ما كذب = كم سربة يعزل غزايز خيلها وركابها
شيخ له التاريخ با الامجاد والعزة كتب = سيرة بطل تبقى ويبقى في الليال كتابها
وربعي بني الحارث مقابيس الوغى جمرة عرب= أهل الثلاث البيض محد جاهل بألقابها
أهل الشوايع بالوقايع تروي السيف الحدب= وقت اللقاء وقفاتهم كل يحسب حسابها
سقم العدا حماية التالي مقاديم السرب=أهل الجهام اللي على حد الخطر ترعابها
سيل ليا منه تحدر في المناحي واضطرب= خطر يشيل أعلى الجبال الراسية وهضابها
ومبروك يا ناصر خذيت البيرق ونلت اللقب= شاعر علم والجايزة ما غيرك انت أولى بها
فزت بجداره ما حسبت بموقفك لآطلق شنب= وكسبت فوق الجايزة حب البشر وأعجابها
ما هي غريبة لو خذيت الجايزة ولا عجب= وانته من رجال الهزيمة دوم ما ترضى بها
جدك ليا منه وقف في موقف الشدة غلب =وخالك على روس العدأ سيف يقص ارقابها
واليوم من فضل الله أن الآمن فى الدار استتب= أمن وخير ونعمة واجب شكر وهابها
والله يعز ملوك دولتنا مفككة النشب = حكام نجد اللي تؤمن دوم من يلجا بها
ما زعزعك يا دار متسلل ولو انه وثب= ما قدمه الا أهل الحراب اللي تسن حرابها
من حط رأسه داخل المحبال في حبله نشب=وان كبرت الفتنة بتأكل من قبس مشهابها
نعفي وندمح زلة الجاهل ونمهل با الغضب=والا ترى كل السوابق خابرين أربابها
وحنا خليجيين وحدتنا ترى وحدة شعب = أخوان ناقف صف واحد في المحن وانشابها