ياابومحمد يازبون الطايله في كل حين=ياماسكن سبل المراجل من زمام ايدينها
ياللي لك المجد التليد منزلٍ صفح الجبين=عندك صعيبات الأمور الكايده يهوينها
يامزبن الملهوف لامن حدته غبر السنين=والله مالومه لانشد عن ديرتك هي وينها
انا اشهد انك كاسبٍ في ذا الزمن دنيا ودين=وياقل من يجمع سواتك ياولد ثنتينها
جيتك وانا شايل معي نفحات فل وياسمين=ماكل واحد قادرٍ يجمع شذى تكوينها
عسفتهن عسف المهار إلين صارلي ذعين=عسف المهار اللي تطاوع لمر عسافينها
ثم قدتها قود الجمل اللي مطاوع للرسين= وليلة زفافك ياعريب الساس لك مهدينها
فيها التهاني مثل همال المطر وبل الغشين=سحايبٍ تمبت هشيم الارض من غشينها
وقول ماقالوه قدامي هل الراي الثمين=قول الرجال اللي ماحنا ياولد غاوينها
عرب نسب ولدك ياطلق المحيا واليمين=يشفيك لامن لوصت شهب السنين ابعينها
ونته تخيرت النسب من روس قومٍ غانمين= من روس قومٍ كم وكم من سربةٍ مفنينها
قحطان من يجهل بني قحطان عوق المعتدين=اللابه اللي فالمعارك خسروا معادينها
ودام الخنافر هم خواله ادحم بجنبٍ متين=ذروت سنام المجد من وقتٍ مضى راقينها
وعمانه عمان السعد هم لابتي درعٍ حصين=اهل السيوف اللي من ادمي العداء مروينها
الليا ضمينا ماروينا لين نشرب نبع عين=كبودنا عن بعض شربات العرب مغنينها
والجار ماينهان بحمانا وحنا غايبين=وشلون لو صرنا بوسط الديره وحامينها
والضيف ياكل واجبه كبشاً يقدمله سمين= خصله ورثناها ولا حنا بعد ناسينها
وختامها قولوا معي قولوا معي ياسامعين=الله يعزز حكم دولتنا وينصر دينها