هذي طبوعي كل ما عسعس الليل = أصلّـح الدلـة وأجـر اللحونـي
بريـةٍ موزونـة البـنّ والهـيـل = والماء بوزن وحيّ هاك الوزونـي
منهـا تكيّفنـي ثلاثـة فناجـيـل = وأرتاح ويطير النعس من عيونـي
وأراجع الذكرى وأجـرّ المواويـل = والذكريـات بكـلّ شكـلٍ ولونـي
البعض منها يشرح الصدر بالحيل = والبعض لا والله يجـدد طعونـي
وأرجع وأفكّر في الليال المقابيـل = لعل وقتـي مـا يخيّـب ظنونـي
وأدخل على الله من حياة الغرابيـل = حيث إن همّي ما تشيلـه متونـي
كنّك مفصّل فوقي الهـمّ تفصيـل = لين إلتبسني مثل لبـس الجنونـي
حالي كما حال القلوب المشاغيـل = اللي من أطرف شـيء يتأثّرونـي
لو يشتكون الغبن والجور والميـل = للغيظ وسط صدورهـم يكتمونـي
فكّرت الا الموضوع يحتاج تحليـل = وفنّ الدراسة واحـدٍ مـن فنونـي
عرفت وش عكّر مزاج المشاكيـل = يوم إنهم مـن وقتهـم يشتكونـي
أول سبب: نقالـة القـال والقيـل = الطغمة اللـي جعلهـم يذهبونـي
قلوبهـم بالحقـد سـودٍ مغاليـل = ومن طبعهم بالمشكلة يفرحونـي
وثاني سبب: ناسٍ على مثل ما قيل = لا يقطعـون الشّـر ولا ينفعونـي
والله ما يرفع ضغطك إلا المهابيـل = العالم اللي في النحـر ينشبونـي
وثالث سبب: ناسٍ سوات المخاييل = على سلوم الطّيب ما يحرصونـي
خلّو سلوم أجدادهم رغو مع سيـل = وفي عالم التقليد جو يركضونـي
طشّوا عمايمهم ولبسـوا بناطيـل = والموس فال أشنابهـم والدقونـي
وأرقابهم ما سلمت من السلاسيـل = تطبّعوا بطبـوع هيـم البطونـي
في ذمتي ماعـاد باقـي رياجيـل = إلا القليـل وجعلهـم يثبتـونـي
صفّة بعد صفّة وجيلٍ بعـد جيـل = كلٍ من اللي قبله أنقص وأدونـي
هذي هي الأسباب من دون تفصيل = شرحت روس أقلام بس أعذرونـي
واللي يبي تفصيل بالحيل بالحيـل = يقـدر يكلمنـي علـى تيلفونـي