يا نمر يوم أنك للأمثال دليت = وأخذيت من زين القصيد الحلاوي
عز الله أنك من مبيعه تنقيت = أبيات يصلح عدها للمهاوي
سبقتنا يا نمر وش عاد خليت = حنا بعيد ولا وصلنا الحراوي
قدامنا تختار بيت ٍ ورى بيت = نقيتها نقي الشطير القصاوي
وعالجت في وصف المحبي وأبريت = وأخذت من معنى الطبيب المداوي
وذبحت لك ناس ٍ مشافيق وأحييت = وأحميت في بعض القلوي المكاوي
يا نمر لو جت لي على الكيف سجيت = لا شك ما تنفع كثير المناوي
أنا لو أني داخل السوق طبيت = أن كان لي يا نمر مثلك براوي
يا نمر خف وأرجع لربك ليا أخطيت = خذ راي من يعطيك شوره شفاوي
ذكرتني شي ٍ بعد ما تشاويت = القحويان اللي بحد المطاوي
رجعتني مع جرتي عقب ما أقفيت = أنا بصنعاء والهوى بالصداوي
أودعتني مالي جدى كود ياليت = رمح الهوى في بسرة القلب هاوي
وأسلم ودم بالخير يا طيب الصيت = وأوصل سلامي طيبين الهقاوي