دار الزمان وشفت منه المصايب=همي يزيد وحسرتي مالها قياس
ودموع عيني فوق خدي سكايب=والقلب مل امن المصايب والاتعاس
هليت دمعي والليالي غرايب=هليت دمعي ثم ضاعن الانفاس
ابكي على ابو سعود اعز القرايب=رجلٍ وفي ماشفت مثله من الناس
رجلٍ شجيع ودايم البال طايب=من روس ربعٍ متعبه قب الافراس
يلفونه الضيفان من كل صايب=لكن اخذه الموت قطاع الارماس
الموت مايعرف شبابٍ وشايب=دربٍ يسير وكلنا فيه نحتاس
من عقب ابو سعود والبدر غايب= والكون مظلم والليالي بها باس
روح وصار القلب بالحزن عايب=روح شجيعٍ كنه الطير قرناس
الموت لامن حل جاله سبايب =والدايم الله خالقٍ كل الاجناس
جانا الخبر وانا من العلم هايب=والفكر من زوغات الايام محتاس
قالوا توفى اللي يفك النشايب=قالوا توفي طيب الذكر والساس
وجريت ونه من ضلوعي غصايب=ونه مريضٍ ون من شده الباس
ودموع عيني فوق خدي صبايب=دمعه يتيمٍ حال من دونه الياس
واقول يادنيا كفايه مصايب=خلاص يا ديناي شيبتي الراس
شلناه يم القبر والدمع سايب=والمقبره مليانه كلها ناس
حطوه مابين اللحد والنصايب= وعيوننا تدمع والارياق يباس
قفيت وظلوعي بصدري صوايب=والقلب من حزنه فقد كل الاحساس
ابكي على اللي رابع الشهر غايب=شهر الرمضان اللي به الناس لناس
والحزن في صدري يسوق الركايب=والحال تعبت والزمن مابه اوناس
يالله يامعبود منشي السحايب=ترحم شجيعٍ سيرته ترفع الراس
وصلاه ربي عد ذاري الهبايب=على النبي عداد ماهب نسناس