ياحروف خلت اسمي علم بين الرجالي=افتخر بك بين باقي الحروف الأبجديه
الحروف اللي على شانها عنيت حالي= الحروف اللي لها في الضماير مقدريه
خمسة حروف تخاوت على مرٍ وحالي= كل حرف له مزايا تخصه عن خويه
أول حروف السعد يا موجهت السؤالي = حرف (شين) اللي هل المجد تضرب له تحيه
شايل لاسم الشجاعة وللشدات شالي = الشجيع اللي عزومه على الشدة قويه
وثاني حروف السعد بعد حرف الشين دالي = حرف (دال) اللي مع اسمي مواقيفه جليه
رمز يرمز للدنادين ماضين الفعالي = الرجال اللي تسابق على سهم المنيه
وثالث حروف السعد حرف( الالف) الالف غالي = غاليٍ صرفه بصرف البنوك المصرفيه
الولد منا عن الف من قروم العيالي = والف عن مليون رجال والا ازود شويه
ورابع حروف السعد( دال ) حظ الدال عالي = شايل اسمي منه حرفين مابه حرف زيه
وخامس حروف السعد (ياء) وحرف الياء بدالي= كنه آخر قطرة من هماليل الرفيه
هاذي حروف السعد من جمعها ثم قالي=( قال شدّادي )! يجف البحر وينش ميه
ايه شدّادي وصيتي طلع من طيب فالي = ايه شدّادي وافاخر وفي راسي حميه
ايه شدّادي عريب النسب عم وخالي= ايه انا من روس قحطان قوم المزحميه
ايه شدادي مغارم كريمين السبالي= هم بني عمي بني الحارث القوم الرويه
والشجاعه عادةً لي بساحات القتالي= آرد حياض المنايا على وسق المطيه
والكرم والجود طبعي على طول الليالي= ماتغيرني ظروف الحياة السرمديه
اعزم الجيران واذبح لضيفي من حلالي = وانطحه بالعود الازرق وكيف الشاذليه
مانسيت حقوق جاري ولا يوم طرا لي = اترك حقوق لجاري كتبها الله عليه
ولاني بناسي حقوق الخوي ورب الجلالي = ان اله في القلب دايم مكان ومنزليه
ولاني بناسي حقوق الدخيل اليا لجالي = الدخيل احماه لو كان اعيد الجاهليه
ولاني بناسي حقوق الصديق اليا عنالي = من تعنى لي لقاء مايسره في مجيه
ولاني بناسي وفايه للاقصى والموالي = الوفاء للرجل والغدر للنفس الدنيه
هكذا رباني ابوي واخذت المعالي = بالعلوم الغانمة ماتهمقيت الرديه
هكذا وصاني ابوي وابويه مثالي = هو مثالي من مثالي انا اخذت الوصيه
ولاني بكامل للاوصاف لله الكمالي = الكمال لعالم الغيب خلاق البريه
مار بامدح عزوتي كل ماجا لي مجالي= مدحي لربعي شرف لي ولا هو عيب فيه
تاج راسي عزوتي في اللزوم وراس مالي = تحتمي ميقافها بالسيوف الصيرميه
يشهد التاريخ بافعالنا باول وتالي = في السنين الحاضرة والسنين الاوليه
والنهايه عد ما لاح براق الخيالي = بامر ربي ياصلاتي على محمد نبيه