يامعيض أنا بوصيك مني وداعه = وصاة من خاطب زمانه بتجروب
أعنز على ربك بعزم وبتاعه = أقبل عليه وجنب الناس بالنوب
هو الطمع كانك تريد الطماعه = وهو الذي فرج للقمان وأيوب
حاذور عن درب الرداء والقطاعه = قبل الدهر يأخذ لك اللبس مقلوب
أوصيك لا تتبع خطَات التباعه = وألا السفيه اللي من العقل مسلوب
المجرم أبعد عن بلاده وقاعه = تبا المكاسب والطمع وأنت مكسوب
من طابع الخايب كسب من طباعه = وأحذر ترى النمات والكذب عذروب
ترى القمر بيّن يدلك شعاعه = شخوص الرجال إلها طواريق ودروب
والوقت لا يشغلك كثرة نزاعه = مالك ومال الخلق طالب ومطلوب
ومن طاب مفعوله يطيب إستماعه = ترى الذي يجري على العبد محسوب
وترى الردى سهلٍ تناله بساعه = وألا الظفر دونه معاريظ وصعوب
وأحذر ترى الأنذال عدوان قاعه = قربك لهم مثل الدنس يطبع الثوب
والرجل يعرف منطقه وإندفاعه = فعل الجميل ويحتمي كل ماجوب
رجلٍ على البتعه طويلٍ ذراعه = ما ينثني في صوب والعز في صوب
ورجلٍ معه مالٍ سوات الوداعه = لو كثر ماله عايشٍ عيشة الدوب
ورجلٍ بلا ربع ٍ شقين رعاعه = لو كان يركض دايم الدوم مغلوب
الله يوفقنا الهداء والقناعه = الدهر له حلال والرزق مكتوب
وصلوا على المختار راع الشفاعه = إعداد ما ذعذع من الريح دالوب