[RAMS]http://www.sh3be.com/song-12621.ram[/RAMS]

شهر تسعه علينا حل و لا أشوفه على السفره=هذا ثاني رمضان يمر و أنا فاقد أعز إنسان
هذاك المذن و يسأل هو وينه غايب ٍ فتره=و هذا باب هالمسجد وحشه الشايب السلطان
درج هالبيت يترجا رجوله تدوسه لو مره=و لكنه بقى صامت فأمل يتحقق الطلبان
تراب الديره يا شاهر يعيد الكر فالنظره=يمينه لا شماله لا يظن إنه نوى النسيان
شجاري البيت يا خيي تجرد من بها الخضره=عقب ما عـِلمت إن جدي رحل للخالق الرحمن
بيار الما و جفت في قعرها مابقى قطره=مصلاه إللي فالعارض هجره الناس و السكان
بقايا زراعته تبكي معاها بلاد أبو الحفره=بقايا الخوخ و المشمش مكسر حزنها الأغصان
الأسهم محتويه القحط مع المكظم مع الفقره=بقايا اللوز يتحسر مع غصن ٍ من الرمان
زوايا البيت تتألم بعد ما أقضى بها عمره=هذاك المجلس الأبكم كره ياشاهر الضيفان
هذيك الغرفه اللي بآخر المنزل نوت هجره=تريد تغادر الديره تريد تهاجر الأوطان
أناظر كل ديره قد مشيناها غدت قفره=ألا يا قبر علمني عسى ماهو علي زعلان
رحل و الكل له يدعي عساه الرحمه و الغفره=رحل و الكل يتحسف و لا مثله بقآ إنسآن
هني إللي لفا جاره بحياته و إلا في قبره=عليه بالحرام إنه سعيد الحظ يا الأخوان
أفكر وش يجيني علم لا منّه بدى بكره=أبي هالناس تلفيني تقول إنه كذب يا فلان
و لكنه رحل من جد عن حدود الوطا بأسره=عسى ربي يصبرني و يرزقني قوى النسيان
الا ياذا الولي يارب تسفّر عتمة الحفره=و تجعل ريحه الراحل من الكافور و الريحان
تسكنه الجنان العليا يا ذا العلم و القدره=ألا يا ربي بالرحمه ترّجح كفة الميزان
و تغفر زلته إنكان له في ذا الزلل سمره=ألا يا من إليك العفو تعفو عنه بالإحسان