تزاحم بالضمير هموم قلبٍ حايرٍ مكسور =ولا ينفع بقلب المنكسر كثرة جبايرها
تلاطم بالضلوع العوج موجٍ عاتيٍ وبحور =ولا من مركبٍ وشراع إليامن ثار ثايرها
أنا مالي بها الدنيا سوى قلب وقلم وشعور =وصديقٍ صادقٍ ياقف ليا صكت معابرها
وليا ضاعوا بليَّاها حياةٍ من نكد وعثور =فلا مطرودها ملحوق من كثرة عثايرها
أنا قلبي دليلي في زمانٍ مدبرٍ مسعور =كبيرٍ مايهمه لو تحاول به صغايرها
ألملم بالقلم أشتات روحي في ورق وسطور =وأنثر كل معنى في ضمير اللي يناظرها
لي إحساسٍ يصور ما يحوم بداخلي ويثور =صدوقٍ وأعذب الأشعار ما تصدق مشاعرها
صديقي صعبٍ أختاره بعالم بالأنام يمور =حسود وجاهل وراعي مصالح مع مكابرها
يا كثر اللي يتضاحك لي وقلبه بالمرض مغمور =على وجهه يبين اللي يخفِّي في سرايرها
صديقي مأمني ياقف معي بالخير وألا شرور =ولا يبيع الذي بيني وبينه فعل غادرها
ولا ينسى ليالينا ولا هو جاحد ومغرور =مواقفنا القديمة دايمٍ بالخير ذاكرها
ياليت الروح بحمول المصايب والعذاب تثور =دخيلك شيلها يا مال وين اللي يثورها
علينا من عنا الدنيا متاهات وشقا ودهور =ولو إن الجبال تشيلها ما أظن تقدرها
إذا بظفرك طرفت العين لا تدور على دكتور =ترى ما تحرق النيران غير اللي يجاورها
لو الدنيا على كيفي أسوقه ولو تجي بعسور =ولكنَّا على كيفه نغامر في مخاطرها
أنا وقتي غدر بي مالحظي بالزمان عبور =سنينٍ يقطعه ما أقساه ما ترحم مسافرها
ناسٍ كنها تقضي حياتها في وسط تنَّور =وناسٍ مادرت عنها ولا ذاقت مرايرها
أنا كلي عذر واللي شكا من هالزمن معذور =وأنا أدري جرح روحي زاد من كثرة تعذرها
تصنعنا السعادة يوم سرنا في فرح وسرور =نحاول نخفي العلة وتفضحنا عبايرها
على الله كل شي يسير وأيام الزمان تدور =متى تضحك لنا الدنيا عقب ما شان ناظرها