الردود الواردة على القصيدة حتى الأن...سوف ننتظر البقية..أن وصلت..ونطلب التصويت على الأفضل!!
(القصيدة)
يعجبني المعنى ويطربني الطرق=ويشدني سبك البيوت وبناها
ونفسي تتوق لمنهلٍ جمه أزرق=يبل صاديها ويقطع ضماها
على ضفافه جرد الأغصان تورق=وأثمارها تكبر ويكبر عطاها
لكن غدن مني بنات الهوى سرق=وبكيت ترفاتٍ تقافت خُطاها
أحلى البنات الغِيد والشُقر والطُرق=أمْرّهن ما أقدر أوصف حلاها
أعمارهن شهور مابينهن فرق=عشرين مع عشرين قفت وراها
ماباقي الا الحيزبونات والبُرق=أقبالهن شيب العيون وعماها
أدور معهن دورة الدم فالعرق=والنفس تعبت ما حصل مبتغاها
عتقت من رِقٍ وطبيت في رِق=أتبع هوى الشمطا وأدور رضاها
تسوقني للغرب واسوقها شرق=وأطلب من المولى يحقق مناها
هاجوس دوك القافيه شدها وارق=صافح سحايبها وعانق سماها
اشرب سديم وشب نارك من البرق=يمكن مفاتيح الفرج في سناها
وهات النتيجة قبل لا اتوه وأغرق=في لجة بحور الهجوس وغثاها
فصل الخريف أحرق خَضَار الورق حرق=ذبح ربيع الارض وأزهق شتاها
(1) رد هاجوس
يا مل قلـبٍ ينسـرق للهوى سـرق=وحالٍ سقـام الحـب فعـلا براهـا
قاسي الحديد يلين مع حامي الطـرق=وحلو المعاني ذي والأخرى تراهـا
يا جد كانك صدق بتجـاوب الـورق=قصة غرامي صدق ما أحـدٍ قراهـا
هذي سنين العمر وشهورهـا فـرق=وهاجوس يـا جـدي ورا مستواهـا
وباقي الوصوف بميسم النار له عرق=حتى تبين وصوفهـا فـي ضحاهـا
يا سعود في أذن التايهة سو لك شرق=ويبين سارقهـا ومـن هـو غذاهـا
دنياك تمرق حلو الأيام لـك مـرق=شمطا ودايـم فـي يديهـا عصاهـا
هذي هقـاوي والهقـاوي لهـا زرق=رمـاح المعانـي جـدد الله عطاهـا
والمعرفة بيني وبينـك تـرى بـرق=ما حدد العالـم تـرى مـن لغاهـا
(2) رد فواز موبص
يامرحبا..عداد مايسجع الورق=وأعداد همال المزون وحياها
باللي صدر بيته على قافية رق=أبيات شعرٍ تذهل اللي قراها
يشكي من سنين العمر يوم تزرق=وصل أربعين ولا عرف كيف جاها
لاتحزن من الشيب ياطيب العرق=وقار في روس الرجال ولحاها
دنيا دنيه تطرق أعمارنا طرق=الحيزبون اللي خبيثٍ لماها
أول لياليها غناج وتزبرق=ترمي عبايتها وتحذف غطاها
وآخر لياليها سواليفها قرق=تشين حليتها ويقفي صباها
ما تخدع الا ناقص العقل الأخرق=ويامن طردها منت لاحق مداها!
ياعم مالي عن قصيدك تدرق=لو القوافي واصله منتهاها
للشعر قدر وللسوالف تطرق=وهوايتي بدع البيوت وغناها
ماشدني عودٍ وطبله ولا أورق=ألي هوا والناس تتبع هواها
والديرة اللي روس شعبانها فُرق=ما أرعى مراعيها ولا اذوق ماها
ليا ضاق صدري وقت في قمة أبرق= بارضٍ حباريها تسابق قطاها
والي مع أهل الشعر مخرج وممرق= وأخاطب العالم حسب مستواها
ولابد من بعد التجمع تفرق=وكلٍ يموت وحاجته ماقضاها