يالله يارب القوي والضعوفي= طالبك يالمعبود صادق ومن جد
تفرج لقلب لافه الهم لوفي=وابغى انشراحت خاطري ويتعقد
بلاي يوم ابطو علي الضيوفي =هذي سنه والضيف ما قلت له عد
قالو بلاك محنيات الكفوفي =جاك المرض من عقبهم قلت لابد
قالو كبير وجبت عميا الصنوفي =وديانتك يابسيس ما هيب من جد
قالو تغني قلت ماهوب حوفي= احسب لياليه ولا اعرف لها عد
قالو قصيدك ترسله بالظروفي = على الاذاعه قلت شي موكد
بغيت اطب البيت واسعى واطوفي= وابات في روس الجبال اتعبد
وبعض العرب يصدق ليا اوعد ويوفي = وبعض العرب مجنون ما يحفظ السد
وانا بلاي الحره ام الشعوفي = عهديبها بالقيض مع نزلة العد
ويابو سفر لو ساعفتني ظروفي = كان التزم بالصبر والصبر له حد

أمس الضحى عديت رجم ينوفي = سارت له اقدامي على غير مقصد
وبديت في راسه ومديت شوفي = وليا الديار سنين والوقت ممتد
وساعة بديت الرجم زادة حسوفي = وتسابقن ادموع عيني على الخد
ذكرت تاريخ بفكري يطوفي = وابني بيوت من التفاكير واهد
تاريخ ربعي من قديم امعروفي = كلن على فعل الشدادين يشهد
اهل الشهامه مكرمين الضيوفي = ذباحة الحايل وحماية الحد
يوم الطرد ومصافح بالسيوفي = حريبهم من فعلهم يشكي الضد
اليا انتخو من فوق قب الردوفي= طالاتهم وسط المجالس تردد
عاشو عزاز ولو لحقهم صدوفي = قاسو من الايام والجوع والكد
كانت منازلهم ورى الماء صفوفي = ماتسمع الا ضجة الطرش والورد
اخذتهم الدنيا بسيف الحتوفي = واليوم في حزم منيف على العد
يالله ترحمهم وفينا تروفي = مكتوب والمكتوب ماعاد ينرد
ومادام حنا تحت حكم الظروفي = الحزن اله وقته ولا للسعد حد
لو ذقت من مر الليالي صنوفي= لابد ماتشرب حلاها وتسعد
وانت يابو فواز بالشعر توفي = شعر على معنى ولايلحقه نقد
وانته كريم وللمراجل تحوفي= وانته صليب الراي ومعرب الجد
ابدعت في المعنى وصنت الحروفي = وانا اتشرف يوم تطلبني الرد
تقول قلبك عاشق له هنوفي = واقول انا ياخال ماعذرب الود
البيض مايرخص لهن امخلوفي = هن زهرة الدنيا والاموال تنفد
واذا عشقت اعشق جميل الوصوفي = بنت طويلة جيد مبرومة القد
والعين نجلا ماغطتها الكفوفي = منطوقها حالي ووردية الخد
بنت صغيرة سن كب النصوفي = مغير راس الحول وانت متنكد
واحلى المهار اللي ماهوب معسوفي =متذيره وانت تعسفها على اليد
لو مهرها ياصل ميات الالوفي = انا معك ياخال واوفي لك المد
ماهمك اللي بالمجالس ثروفي = يضحك معك ومن الردى قلبه اسود
ولايغير فيك راي الضعوفي = لارايهم ينفع ولا عندهم سد
منهو تطوع قالو افلان صوفي = واذا تغزل قيل كافر وملحد
وصلاة ربي عد برق رفوفي = مني على خير البريه محمد