بدون مقدمات...لعلها تنال شئ من القبول
يا "أستعارة اسم" لفي لي زقاره=دندن الهاجس وجيت الشعر كلي
وأستوى شيطان حرفي في مداره=وأرتقى فوق الطويل المستقلي
أسمعي والحر يفهم بالاشارة=وكل ما جريت عجز القاف شلي
في خضم ضجيج الاسما المستعاره=أخذي من علوم خلق الله وخلي
والمخضرم.. كل ما يسبك عباره=دونيها وأحفظيها فالسجلي
الشعر فكره وصوره واستعاره=يفترش في مجلس أهل الذوق زلي
نادرٍ يعطى على شوفه بشاره=ما تهيا للشويعر والمقلي
الفرايد نار والفكره شراره=المحنك لاباغها ما يظلي
ياقصيدي والخصم نوره وساره=مستعير أسم المره خله يولي
ما يهين الشعر ويهز أعتباره=غير مد ايده على الكف الاشلي
ومن يقول أن "السفاره فالعماره"=قل نزل على عمارتكم مضلي
لايغامر في مجاهل ضلع قاره=ولا يردد "ياحلاة الشعر حلي"
ياقصيدي والوزير بلا وزاره!=قربةٍ فيها مية "فري ومشلي"1
جر تلبابه ولا تقطع زراره=خل وجهه للضحوك وللتسلي
وميز الشاعر ولا تنقص وقاره=ولا توريه التجاهل والتغلي
و"خدج الساحه"2 وعشاق الاثاره=لا (تدون شخبطتهم فالسجلي)
فرق بين اسم العلم وأسم الاشاره=فرق راع الدين واللي مايصلي
1-عبارة للعلم بندر أبن سرور
2-عنون قصيدة للمبدع مطلق المطيري
سعود أبن سليمان