شبكة الشدادين - عرض مشاركة واحدة

توقيع : السلطان

مساكم الله بالخير جميعاً يا ربعنا الأعزاء
وعساكم على القوة اليوم ودوم
وبما أن ما فيه أحد يبغى يأخذ المايك ويتكلم
من البارح إلى الآن حوالي 12 ساعة

أنا بأرجع من جديد وآخذ المايك وأتكلم
الأيام هذي ثرثرتي واجد

تدرون وش أكثر شيء يحرق دمي ويثير أعصابي؟!!
رغم إني والله عندي قدرة كبيرة على ضبط النفس والتحكم
في أعصابي لأبعد الحدود ،،، لكن فيه شيء يحرق دمي وأغضب
وإذا غضبت أتعب كثير وتوتر أعصابي ...!!!

تدرون وش هذا التصرف اللي يسبب لي كل هذا الإزعاج؟!!

الصحبة اللي ما يقدرها راعيها معي ويبيعها بأبخس الأثمان ...!!!
يوم أكون مع أحد طيب وكريم وما أقصر معه ولا بشيء وتدوم صحبتنا
فترة وأتفاجأ بذلك الشخص يصد عني أو يتهرب مني أو يهجرني أو على
قولتنا ( يحزم خشمه ) إذا شافني كأني ذابحٍ أبوه ,,,, والمصيبة إني ما أدري وش السبب؟!!

هي هذي المشكلة يوم ما يكون فيه سبب واضح لي ولا يجي يبينه وفي نفس الوقت يتغير علي
في هذا الوقت ودي والله إنه يجيني ويقول يا سلطان ترى جاء منك كذا وكذا وكذا ...

والله والله والله ما عاد تفرق معي إن جاء بعدها وإلا راح الله يستر عليه ,,
ودي إنه بس يواجهني عشان أعتذر منه إن كنت أخطأت في حقه بدون قصد
أو أقول له هذا الكلام ما حصل وانا بريء مما تتهمني به يا صاحبي ...!!

لكن كونك تزعل أو تسمع في صاحبك وترخي أذانيك لفلان وعلان وبعدها
تحزم خشمك علي وتضيق وتخليني في حيرة من أمري فهذا والله هو اللي يتعب أعصابي

تعال وقل لي وش عندك وخلني أبرر اللي حصل كان حصل شيء وبعدها عسى دربك
خضر والله يستر عليك ...!!

من جد والله فيه عالم بهذا الشكل ويا كثرهم ,,, مساكين ما عندهم ثقة بأنفسهم
ولا عندهم رأي وعقل يسيّرون به أمور حياتهم ,,,

ويخضعون وقتها لكل ناعق وزاعق يتحكم بهم ويحدرهم ويسندهم على كيفه
ويتلاعب بهم كيفما شاء ،،،
إن قال يمين راحوا يمين وإن قال يسار راحوا يسار

مساكين هؤلاء الناس
لطف الله بقلوبهم وغفر لهم