محاورة ابو عماد ومن رؤس بنيوس وسعود
ابو عماد
الكلام يزين لا حل من بعـد السـلام=ردةٍ تضفي على اهل الديّر في ديارها
العرب مابينهم غير حشمه وحتـرام=لين تقدح من شراره وتالـع نارهـا
من رؤس بنيوس
الكلام يزن لاجاء الكريم ابن الكرام=مرحبا ترحيبـة عالـي مقدارهـا
والعرب مابينهم لاخلاف ولاخصـام=ولوتشب النار تقدر تدوس اخطارها
ابو عماد
اعرف انا للوفا لابسين اعلى وسام=البقالك والسوالف لهـا مسعارهـا
كان مابه نقض للفتل ماقلنا تمـام=والعرب حملة جملهم يضيم حوارها
من رؤس بنيوس
حشمتك يابوعماد ان تسلى بالكلام=وان تنقى من علوم الرجال خيارها
ما نبي في جونا لاغيوم ولاعسام=والسوالف بيننا لاتبيح اسرارهـا
ابو عماد
من بنا بيتاً بلا ساس خطراً بالهدام=والعلوم الطيبـه طبعنـا نختارهـا
الردى ماله مع الناس قدر ولا مقام=بس لابد الحقايق تبيـن انوارهـا
سعود سليمان
مايدس الراس وقت الزحام الا النعـام=أحتزم والملعبـه دوب شبـة نارهـا
انا جيتك يا أحمر العين في كفي حسام=وكل نفس تشيـل سياتهـا وأوزاهـا
ابو عماد
كنت حاسب غيبتك من تراخي في العظام=مير ياطير السعد جيـت هابـد زارهـا
ابشر إنا في الوعد والفشق مليّ الحزام=ون بغيت يمينها ون بغيـت إيسارهـا
سعود سليمان
والله أني لعقل الثلب ملعون الرسـام=والمسوح أم الحوارين أفك صرارهـا
سقتها عليك سوق الجمل والدرب شام=لو تجاهلها المطيري تجيـه أخبارهـا
ابو عماد
شب نارك ونت داخل لهبها بأنتظـام=لين يدري عنك منهو لجاء في غارها
لاتحمل نفسك الجور ياشيخ الجهـام=التجاره في البلـد حولهـا تجارهـا
سعود سليمان
لا تداحم وأنت جنبك يلين مع الدحـام=ميز عضود النشاما وطول أشبارهـا
ولاتضن الغارب يزيد عن طول السنام=كل حاجـه يالسنافـي لهـا معيارهـا
ابو عماد
صورة القسيس ماهي لنا غاية مرام=لو على راسه يحط الحُلل بأختامهـا
اعرف ان الطق يالحارثي فك اللحام=ونت عينك ليش قامة تخون اعياره
سعود سليمان
يامطير أموال حجاج بيت الله حرام=أمنوا عمارهـا وأمنـوا زوارهـا
عاهدونا وأمنونا قبل شهر الصيام=قبل لا تغضب ديركم على كفارهـا
ابو عماد
ماعلينا من صلاة المؤذن واليمـام=شوف عين الرجل يكفيه قص اَثارها
ياسعود ابعد عن اللي توديك الضلام=ليش في حفرتك حولـت ياحفارهـا
سعود سليمان
أحسب أنك شيخ .. لكن طلعت من العوام=وأحمد الله دلتـك مـا عبـرت بهارهـا
ما لكم يا شلة المهـد نهـج ولا نظـام=كـل ماقلنـا صفيتـوا يثـور غبارهـا