على فعوله يشهدون السدارا = قول ٍ ليا قلناه ما فيه تكذيب

يا بادعين القاف بدعه خساره = لا صار ما ينقال فأهل المواجيب
اللي لهم في المجد ساس وعماره = زحول الرجال امطوّعين الأصاعيب
أقولها والشوف مرهي عباره = والقلب كنه جوف حامي اللواهيب
عليك يا شيخ ٍ يذرّي جداره = محماس أخو سارة أمير ٍ على طيب
أمارة ٍ يا حيّها من أماره = على الفعول الطيبه والتجاريب
وأبوه قدّامه مقدي النماره = شرار متعب كاسرات المصاليب
عقيدهن وان روّح الجيش غاره = وأليا بدا السبّار روس المراقيب
عوق المعادي في نهار الكراره = وياما شعا من جل ذود ٍ حنازيب
شيوخ الفعايل والفخر والكباره = يشهد لها التاريخ وسط المكاتيب
ومرحوم ياللي ما طفى الوقت ناره = يا معزّب اللي ما لقاله معازيب
يفرح ليا من زار بيته خطاره = أقراب وألا من بعيد الاجانيب
ما صك بابه كارهن للزياره = وأليا لفاه الضيف يلقى التراحيب
وفنجال بن ٍ ما غوينا بهاره = ومفطحات ٍ في الصواني تعاجيب
وأن جاء نهار الهوش ثاير غباره = على العدا كفه عطيب المضاريب
من دون ربعه ما حسب للخساره = حيد ٍ يذرّي في السنين الشلاهيب
ولا قط صابه في المواقف حياره = وبين القبايل حل عسر المناشيب
مقطاع حق وطيّب الشور شاره = شيخ ٍ على بيته تلافا المراكيب
وعلى فعوله يشهدون السدارا = قول ٍ ليا قلناه ما فيه تكذيب
وأليا ذكرته شب بكبدي حراره = والدمع جاء له من عيوني تصابيب
لا والله اللي راح رجل الوقاره = والموت حق ولا عن الموت تجنيب
وعزي لمن مثلي يحب الشطاره = مار الليالي خاينه للأصاحيب
راحت بأبن مهرس رفيع المناره = وغديت مثل منادي ٍ ماله امجيب
يالله يا ضافي علينا ستاره = يا واحد ٍ تعلم بالاسرار والغيب
تثبت الخاطر بصبر وجساره = وأظن في تال الليالي هناديب
وعساه في الفردوس يقطف ثماره = برحمتك ياللي ما ترد المطاليب