مساجلة فارس بن ضويّان و فيصل بن مهرس
السلام عليكم
بدع ورد بين الشاعرين
فارس بن ضويان و فيصل بن مهرس
يافيصل يابن مهرس ترفّق على المنكوس=حزين وقصيدك زاد حزنه على أبياته
توجّد على وقتٍ مضى وضايق ومعبوس=وجفنك يهل الدمع .. من ماضيٍ فاته
تكابر على شان الهوى والهوى محسوس=تبيّن على وجه ( الهواوي ) علاماته
وانا مامتلك قدره ولا في يدي فانوس=آوقّف قطارك .. لا تعدّى محطاته
دخيلك يابو زايد ليا واردتك هجوس=رفيقك من اشعارك تجٓدّد معاناته
فراق الحبايب خابره كنه الكابوس=على النايم الحالم لافز ب تنهاته
وجع سجة الذكرى على الخاطر المعموس=تخلي من اونسها يجامل ب ضحكاته
تركز مضاربها من القوس لين القوس=وتخلف قوي العزم عن كل هقواته
وانا خابرك قرمٍ تدوس الاعادي دوس=لاجاء الموقف الغصّاب وكلٍ ووقفاته
ليا كبرت القاله ودِق للخطر ناقوس=مايذخر عن لزوم الذي جاه فزعاته
عريبٍ طليق حجاجه وهمّه الناموس=مايقطع بني عمه على قلّ جيّاته
يوم ان المجالس هرج فاضي وشين نفوس=لقاها السفيه اللي تضحّك تفاهاته
وشرواك منطوقه عدل مايجي معكوس=قبل ينطق لسانك .. تحسّب لكلماته
تجيب العلوم الوافيه والرجال جلوس=ولاجبت علمك تلحق العلم باثباته
تشرف بني الحارث وتدرى على بنيوس=ولا يوصفك قاف القصيد وعباراته
حفيد الشيوخ اللي زعلها يطش الروس=ياقو ضرب فارسهم ليا شن غاراته
لـ فارس بن ضويان
هلا بالجواب اللي بـ عذب الشعر متروس=قصيد ٍ تشوق أهل الدواوين بصماته
يابو فهيد هيَّضت الأحاسيس والهاجوس=وقلب العناء ثارت هواجيسه .. و جاته
قصيدك بحر ماهوب ( خبراء ) وجَمَّ رسوس=ورأسك مع أهل الجود .. يا طيب هوماته
رفيقي وأبن عمي وللطايلات تروس=وآفاخر بـ فعلك وآتنومس بـ طالاته
حفيد الرجال اللي ليا ثوَّر النادوس=تضد العدا والسيف يروون سلاته
وأنا يوم آغيب أحيان ماهو جفاء وحسوس=لكن الزمن قامت تزايد ضغوطاته
ولا حدني للشعر ياكود بعض رموس=وقصة غرام ٍ .. ضيَّعتني متاهاته
براني الهوى وأودع ليان الغصون يبوس=ولا يلام من ذاق المفارق ولوعاته
آلا يا وجودي وجد ذود ٍ بـ حر شموس=حداه الظمى والعد طالت مسافاته
ويا تل قلبي تل ركب ٍ سرا كردوس=يتله عقيد ٍ ترهب القوم سطواته
ويا لج صدري لجة الساهر المضروس=تلجه ضروسه وإنتحى الليل ما باته
على اللي غرامه زارع ٍ بالضمير غروس=سقاها الغلا لين أثمرت كل واحاته
ما كنت آتوقع يختلف وضعنا ويحوس=بعد ما عطاني العهد وآعطيته إثباته
لكن الليالي قطّعت حبلنا الممسوس=وطبع الليالي للمواليف شتَّاته
وأنا يوم قفَّى كن كبدي تجزَّ بـ موس=جداي الدموع وجَرَّة القلب ونَّاته
حداني الزمان اللي يحوس المشارب حوس=وحل المفارق وآسبل الجفن دمعاته
ظروف الحياه وحظي العاثر المنحوس=هي أسباب حزن ٍ طالت الروح طعناته
آبصبر على الفرقا وآنوس المعالي نوس=وكل ٍ يجي رزقه على قد نيَّاته
لـ فيصل بن مهرس
وسلامتكم
توقيع : فارس بن ضويّان | ،
أحبّك كثر ماصلّى بهالمسجد كبير وشاب
.................. أحبّك كثر ماسولف رسول الله عن الجنّه 3>
Fares_fahaad@
.. |
التعديل الأخير تم بواسطة ! سارة الغيد ! ; 17 Feb 2015 الساعة 04:44 AM
سبب آخر: تنسيق
|