يا حروف القوافي يا بيوت القصيد=يا كبار المعاني من يلقي الخلي
دون الامجاد قيد مثل قيد الحديد=والمفاتيح بيدي حكمة المبتلي
كان وثقت علم وما لقيت العضيد=مثل قيف بعد زرقا اليمامه بلي
ويش عذري لو اخفي كل راي سديد=ووش تفيد العلوم أن ما وعاها الشلي
مثل نحت الحجاره بالزمن ما يحيد=كل غافل يشوفه والصحايف ملي
في سبأ كانت آيه آمرات وعبيد=يعبدون السراج وربنا معتلي
بادي الأمر قوه وأهل باس شديد=والتوالي الأمر اليك عقب ازهلي
اقويا بالجسوم ومير مامن عقيد=والنتيجه هدية قلب متزلزلي
لا فلاح يذري غير قصر مشيد=ولا مواقف تجري ناظم يفتلي
قوة دون علم / قلب ماله وريد=وعلم من دون قوه / عبد ماله ولي
شدة الباس واموال الغني ما تفيد=والعمارات والجمهور والبنتلي
في نهار المعارك واحتدام الضديد=واشتباك السرايا واشتعال الصلي
وخابر العلم نور وكل علم مفيد=لين طفو المشاعل لاجل ما تنجلي
النوايا نزيهه والمعادي بليد=والخديعه وقيعه مير ما تنطلي
والمشاريه ماهي لأجل زيد وعبيد=ولا على اللي ينادي ياحسين وعلي
ثابت في مقامي مير مامن جديد=مثل من غاب ضيفه والصواني ملي
خل شوفك حديد ونظرتك للبعيد=مثل صقر نداوي دوم شوفه جلي
تالي الوقت طبه مثل عزف فريد=والحرايب مقابس نارها تصطلي
لا خلا وان لقيتم راس أصوك عنيد=سلمولي على القرم واطروه لي
راجمات وبوارج والعتاد العتيد=في يدين المظفر نصر ومنكلي
(والزمن يقترب من منعطف دون سيد=وانعطافه خطر والخير في ما يلي)