يهل الدمع من عيني على فراقك تقول بحور=دموعٍ تغرق عيوني وخطر الدمع يعميها
تظن إني بهجرانك يا سلوة خافقي مسرور=أنا الفرحة سمعت بها ولا أدري وين أراضيها
أنا حاطتني الدنيا بحزنٍ مثل شكل السور=أنا الدمعة وأنا الشكوى وأنا الآه بمعانيها
وإذا الذكرى تلازمني على ما فات أنا مشكور=عسى الأيام تبدي لك خبرها عن لياليها
أبد يا خلي ما جا منك مع جور الزمان قصور=ترى التجريح والقسوة حشا منته براعيها
لكن الوقت ياكل من سنيني والزمان يدور=ودنيا يا أعز الناس ورتني بلاويها
وخلتني كسير الخاطر اللي خاطره مكسور=بقول إنسى يا كم ناس ٍ تناست ناس تغليها
دخيل الشعر وبيوت القصيد وهاجس ٍ مغمور=دخيل عيوني اللي تظهر الدمعة وتخفيها
ما بيك تحس بأحزانٍ عليها الوقت قام يدور=جروحي عن عيونك يا عيوني قمت أداريها
على صدرك يا كم جيت وبكيت من الزمن مقهور=وأحسك كل شمعة من حنانك قمت تضويها
يا كم جيت اشتكي لك ظلم من وقت ٍ اعيشه جور=وكلمة من شفاهك وراي أوجاعي أرٌميها
يااصدق عاشق وقلبك غرامه مايشوبه زور=تفضل وردة المشتاق لعيونك أنا أهديها
تفضل وردةٍ تفضح شعور الهايم المبهور=غرام وعشق وأشواقٍ عن عيونك مخّفيها
أنا مدري خطا وإلا ولع وإلا دلع وغرور=أحاسيس ومشاعر مدري والله إيش أسميها
عليٌ ادهور لو مرت ومرت من وراها دهور=لك الله عشرة سنيني معك ماني بناسيها
على صفحة غرامٍ ما انطوت..يا حبري المنثور=ما دامه روّح لغيري يا جعله يهتني فيها
بزفه زفة الفرحة ولو إني بدون شعور=ألحن له طواريق الفرح جملة وأغنيها
برش ورود في دربه وفي دربه برش زهور=وأجي لمحطمة قلبي بعزة نفس أهنيها
وأوصيها ترى (...) في قلبي المبتور=ولو هي عشرته تشرى لبيع الناس وأشريها
يا روح الروح وأشواقي ونبض الخافق المأسور=على ما قالوا أهل الصبر : (جعل الله يسويها )
وإذا طيفي على عينك يا نور العين مرّ مرور=تذكر بس جواهر ثم قل ربي يهنيها