البارحه شبيت نار الشعر والمعنى حطب= في ليلةٍ زادت برودتها وظلم ليلها
حضرت هاجوس الشعر والشعر ديوان العرب= بناجي نجوم الدجا عن حالتي وشكيلها
يانجم يا نجم الدجا فانا الشجيع اللي يحب = يوم الشجاعه في المحبه ماتفيد وكيلها
فانا وقعت بحب من حبه يهز اطلق شنب= من وقت مانصب شباكه حالتي يرثيلها
انا وقعت بحب من حبه على العاشق تعب= غروٍ ملك روحي .. ولا ياويل روحي ويلها
انا وقعت بحب من وصفه بدا فيه العجب= اقول وصفه فكرةٍ يصعب علي توصيلها
ابا اختصر في وصف خلي والقليل من الذهب = يغني عن اضعافه من الفضه وعن تحصيلها
انا وقعت بحب من وصفه على جسمه ركب = لايق .. ويفرح كل عينٍ غارقٍ منديلها
انا وقعت بحب من خده مثل بيض السحب= لا يا وجودي وجد من يشفق على تقبيلها
انا وقعت بحب من عينه لها طرفٍ هدب = بسهومها ترمي قلوب الخلق ما تأويلها
ترمي سهومٍ بالمحبه كنها نار ولهب = وانا رمتني بالمحبه لين طحت قتيلها
واصبحت اسيره بالمحبه جاهزٍ عند الطلب= يأمر وينهاني بعد والناس مايعنيلها
مار البلا لاشفت بعيونه جفاً ماله سبب= مدري كبر.. ولا غلا .. ولا ماحد يحليلها
الله ياهذا الزمان اللي على متعب كتب= يضحك على امال اللقا والتفرقه يبكيلها
وشلون اواصل رحلتي وشلون ابطل وانسحب= بين الحقيقه والوهم ازريت اعدل ميلها
مار المهم انه نهب قلبي وتفكيري نهب = واكيد يكفي موجز الاخبار عن تفصيلها