البارحه دمعي على الخد همال=وجروح قلبي زايداتٍ عليه
دمعٍ بعد فرقا الشجيعين سيال=وهموم قلبٍ كل ابوها قويه
ابكي شجيعٍ راح بيدين الانذال=راح بيدين اهل الدنس والرديه
راح الذي لاقال يثبت بالافعال=ودايم علومه كل ابوها طريه
رجال لايمكن يبدل برجال=ولاشفت بين الناس رجلٍ حليه
خالي سفر نسل الصناديدالابطال=راع الشجاعه والكرم والحميه
رجلٍ شجيع ولا يحسب لا الاهوال=ودايم يدوس اهل الردى والخطيه
ياخالي انت اللي للاثقال شيال=وانت الذي دايم تقود السريه
وانت الذي يحمي كلامه ليا قال=وانت الذي بعدك حياتي شقيه
وانت الذي لامن وقت العنا مال=نارك على الطالات ياخال حيه
ياخال لو الموت ينرد بالمال=لارجعه قدام يوم المنيه
لكن قدر ربي على العبد نزال=يجيه وهوه ماكتب له وصيه
ينزل على المخلوق لو الزمن طال=وياخذ حياته والسنين الهنيه
ياخال بعدك خاطري صابه هبال=مغير اسج الرجل صبح وعشيه
امشي مع الاجواد وهمومي ثقال=والحال تعبت والليالي مديه
والحزن في قلبي له اقفاي واقبال=والصدر ضاق ودمعه العين هيه
همٍي على قلبي رسى كنه جبال=رسى كما ترسي الجبال الرسيه
والنار في قلبي بدت تشعل اشعال=تشعل من اسباب السنين العصيه
نمشي بها الدنيا على كل موال=ونبكي على الغالين واهل الوفيه
دنيا مصايبها من الجال لاالجال=وهمومها دايم تجيب البليه
ياخال هذا الوقت ظالم ومحتال=ياخذ رجال الطيب والمقدريه
بعدك قلبي جاه ياسٍ وغربال=واصبحت اسير في الديار السنيه
لو المنيه تنبدل بين الاجيال=لاعطيك روحي يالسنافي فديه
وافداك ياراعي الوفاء والتجمال=ماهي حسافه يازبون الونيه
لكن ياخالي اخذ علم رجال=حرام دمك مايروح هديه
مافيه لا ملفى ولا فيه معدال=الا الرصاص اللي تقادح شظيه
والسيف ابوحدين للروس شيال=وهو الذي بيرد علم القضيه
وصلاه ربي عد ماخيل خيال=على نبيٍ مامشى بالخطيه