الله يا ليلة خميس الفجيعه = ثاني عشر ربيع الأول رحل مات
يارب يامعبود عندك وديعه = تغمد برحمتك روحه بجنات
فرقاه صابتنا بحرقه مريعه = يا رب بدل سيئاته حسنات
العابد الزاهد فقيه الشريعه = المرشد المفتي كفيل اليتيمات
الراعي الساعي لخير الرضيعه = والطفل والشايب وعجز ضعيفات
الداعي الواعي علومه رفيعه = الآمر الناهي بأحاديث وآيات
سارع إلى الخيرات عمره جميعه = يعقد قران المسلمات العفيفات
هجد خبر جوال بنته فزيعه = تقول أبوي وجدتي راحوا أشتات
الشيخ ما يرضى علينا الهزيعه = يا حيلة الله والقدر سابق وفات
مستقبل القبله ونفسه نزيعه = ثلاث مرات تشهد وسكرات
قلبه توقف والنفس والطبيعه = مكتوب تقريره سجل الوفيات
لحقتهم للعسكري يالقطيعه = لا طب ينفع له ولافيه حيلات
منعني مطوع سدوده منيعه = بيحت سدي ساعه أبكيه بسكات
يا رب لطفك بالقلوب الشجيعه = ذوي شجاع وحولهم حزن و آهات
يا حرة أمي حر كبد الوجيعه = مصيبة الثكلى صويبات فلذات
عقب العصر ضاقت علينا الوسيعه = كثر شهود جنازته والدعوات
يدعون له عسى محمد شفيعه = يبكون ابويوسف جهوده عظيمات
في الراجحي امة محمد تشيعه = سماحة آل الشيخ إمام الصلاوات
في المقبره تحيروا من يضيعه = تهيبوا من يلحده بين الأموات
أيادي العالم تراعد سريعه = بلت ثرى قبره دموع غزيرات
يا الله عسى روحه بروضه وسيعه = في جنة الفردوس رضوان خيرات
في ذمة الرحمن نفسه مطيعه = حتى لفظ آخرانفاسه بلحظات
قدم بفعل الخير ما يستطيعه = بالدين والدنيا وللناس حاجات
أصبح خبر موته نسيبه يذيعه = في منتديات الشدادين ساعات
باح العزا ياعزوتي نشر ريعه = نتعب وراه وهو جهوده كثيرات
الموت حق اليوم وإلا تبيعه = نستغفر الله من ذنوب عظيمات
فقيدة المحراب يشكر صنيعه = جماعة المسجد بتحفيظ وإنصات
شرح لنا معنى (سراب بقيعه ) = بين لنا التوحيد نفي وإثبات
أقسام للتوحيد حكمة بديعه = لله ربي اثبت أسماء وصفات
دكتور فقه في الطهارة شريعه = إلى سجود السهو أحكام حالات
من شيخ الإسلام وبحوره نفيعه = في فقه ابن تيميه أي اختيارات
بحوث ماجستير وعره تليعه = علم غزير في جميل العبارات
لابن أبي يعلي نصوص متيعه = عن ابن حنبل قي مسائل عبادات
بالجامعه تأصيل ضد الخديعه = حمى حياض الدين ضد انحرافات
نبيه قلب وفكر واضح يشيعه = وزارة الإعلام سدد إذاعات
في المعهد العلمي بهمة سريعه = حدد مساره وانتبه للنهايات
وقت الامانه حافظه مايضيعه = منح أراضي للجماعه بوقفات
في بدر ليله مع نهاره جميعه = علم وعمل مدد ثلاث سنوات
من همته يرقى العلا والطليعه = تجارة وزواج وأحسن طموحات
متوسط يقوم يهجع سويعه = توازنه بين العواطف وغايات
زيد بن حارثة بداية صنيعه = يا حي هاذيك السنين القديمات
أيام منفوحه جماعة جميعه = كان الجميع إخوان حلو البدايات
ربوة عرب وأخلاق دين وطبيعة = والبر منشأ طيب الذكر والذات
ماهمته دنياه قطعة سليعة = نور على الدرب السوي بعلامات
أنكر قنوات الخنا والدليعه = حر ولد حر وعزومه قويات
رجال مسلم مايحب الوقيعة = خدم كرام الناس آلاف وميات
يوم إن بعض الناس رأيه رميعة = يحل أبو يوسف قضايا صعيبات
مشاكل الديره عريضة نصيعه = من رأس طيب والمواقف حكيمات
الصلح خير وله علاج نجيعه = موفق يرقي ويكفي علاجات
فيه الكرم طبع وشهامة وليعة = يفزع مع المضيوم في أي حزات
أصل القبايل بين حلف ونزيعه = شداد ملفي من عبيدة بشجرات
ديوان خالي له وصايا نفيعه = معلقات للعقول الفهيمات
كتاب لأنساب القبيله فريعة = تاريخنا المعروف وثق روايات
مؤلفاته بالحقايق صديعة = جملة بحوثه نافعة بالشروحات
خطب منابر موجزات ووسيعه = خاطب بها الافهام في كل الاوقات
دورات علمية بحوره ضليعة = توحيد مع فقهه وتفسيرآيات
على الفتاوى نوره ابصرسطيعه = من الخليج إلى جبال السروات
إرشاد توجيه الحصون المنيعة = وزارة الدفاع اقوى الوزارات
حارب مجلات الفساد الخليعة = بالجندي المسلم سلاحه مقالات
خوارج العصر البلايا الفظيعة = هم شلة الإرهاب تكفير رغبات
راس العلم مشراف ماهو قشيعة= مشايخه اثنوا عليه بشهادات
عسى السحاب اللي تكاشف لميعه = تصدق رعوده بالحقوق الثقيلات
يسقيه مزن الصيف يرجع ربيعه = طيب ثراه الله رب السماوات
صلوا عدد من كان يرجي شفيعه = محمد النبي ختم الرسالات