يا ونتي بين الضلـوع المغاليـق=ونة ٍ كسير ٍ ساري العظم يشعـاه
عليك يا شيـخ ٍ تسـد الاراويـق=وأليـا بـدا روق ٍ علينـا زبنـاه
أبو عذا اللي يـوم يبسـت الريـق=يفرح به المضهود لا عمست ارياه
ليته ورى سبعة بحور ٍ غواريـق=حي ٍ على البيدا وعينـي ترجـّاه
طالوا به المطران يوم الملاحيـق=على ((نفي)) والحيد لا طال مرعاه
عقبه حياة الناس راحـت توافيـق=البدو واللي ساكـن ٍ فـي قرايـاه
يا ذيب ياللي في الطوال الشواهيق=وداعتك زبن الضعـوف المخـلاه

البارحه قلب الخطا الليل ما بات = من كثر ما تطري عليه الهمومي
ردوا سلامي يا هل العيدهيات = على بني عمي ذياب الخرومي
تلقى لهم في شبة الصبح ظالات = وكبش المربي فيه بيع ٍ وسومي
وأهل نجور ٍ يوم لجت بالاصوات = من حسها ما نستمع في العلومي
منزالهم يم الحرج والعقالات = وميرادهم في الشتو ريع البقومي
وسلاحهم شغل النصارى الضريرات = ماهيب لا تهفي ولا زمومي
وصافي الحديد ولا لقوا فيه خلات = ربعي امضرينن بفرس اللحومي
وركابهم من كل دار ٍ حفيات = من كثر ما تعطي قرار الحزومي
مر ٍ مناكيف ٍ ومر ٍ مغيرات = وسبّارها عدا طويل الرجومي
ياما شعوا من جل لقح ٍ وخلفات = راحت لهم عند النكايف قسومي
حال المردف دونها بالتثبات = ولحقوا طلبها واحتموها القرومي