وجـوب التـحيـه كل ماجـالـنـا ضـيـف =على سلم عادات العرب والقبايل
نقلطه بالـمجلس وندني لـه الكيف = وجوبه في الخاطر ماهو بل القلايل
لاكـن امس شفت الضيف مـد المظاريف=ولا ادري عن المقصود من قول قايل
وقبل مايسلم مدنا بالسواليف=ورعوده وبرقه خيلت بالمخايل
وانا محسب الغربي يجيب العجاريف=وتحديه من قوله خطيراً وهايل
وعلى الهـون بين الناس عرف ومعاريف =ولا هي بهوشه ياقوي الصمايل
ترا السالفه مـزح وطـرافه مشاويف=ولايبقى الـلا الطيٍبه والجمايل
وتبديلك البيضا بروس المشاريف=اقوله وتنشر مع عيال الحمايل
وعسى الله يوقينا شرور الصواديف =وترا الشك يابن عبيد بالفعل زايل

وجوب التحيه سنةٍ مابها زيف=وسنة محمد خير كل الدلايل
نرد السلام ..وننتظر للمخاليف=واثر شاعرتنا .. تحسب الصدر شايل
لكن التحدي ..غير عن سلة السيف=ليا صارت الدعوى ..عناد وفعايل
عسى الضيف مازود عليكم تكاليف=مدام الثقه فالنفس تعمل عمايل
معجرف سواليفي.. وازيد التحاسيف=ولا اوقف وقوفٍ قدم الاجواد مايل
انا راعي الجزله..ولي برجٍ منيف=وانا ما انطق الهزله..ولي راس طايل
وانا اللي مدام الوضع ضحك وزغاريف=بفل الحجاج..ولا حسبت الهوايل
ولكن شيهانه..تبينا على الكيف=نسالم ونستسلم..وماني بقايل
بهاجم وادافع..وانقل اللعب لخليف=وهو يرفع الكوره..بخبرة محايل
واسجل هدف ملعوب ..مادمت حريف=مدامي بطل ..واركي لكل الثقايل