قصيدة مبكيه تقشعر لها الابدان
اللهم فك قيد أسرانا وأسرى المسلمين؛؛؛

أبكت الجميع وحركت المشاعر وأثارت الأحاسيس ...
أم نايف من رحيمه تحكي معاناتها في ابنها القابع بين قضبان سجون أمريكيا في ولاية كلورادو
وقد توجتها بمدح وثناء
لم أر مثله لصاحب السمو الملكي الأمير سلطان بن عبد العزيز ولي العهد طالبة منه التدخل في القضية .
نسأل الله أن يفرج عنه وأن يسعد والديه وذويه برجوعه .

أصيح باعلى الصوت نايف فقدنـاك = عساك تسمع صرختي يـوم أناديـك
أنا أمك اللـي عيدهـا يـوم لقيـاك = يا سعد نفسي لـو عيونـي تلاقيـك
والقلب ناره تشتعـل عقـب فرقـاك = ما تطفي النيران يـا كـود أياديـك
لبست ثوب الحزن بعدك ولا انسـاك = والنـوم ودّع يـوم غابـت لياليـك
تاهت بي الخطوات وادروبي أشـواك = والدمع من عيني على الخـد يبكيـك
أراجـع الماضـي واعيـد ذكــراك = تشدني الذكـرى وابكـي لماضيـك
سجيـن بالغربـة وياكبـر بـلـواك = الله يعينـك دايـم فــي بـلاويـك
هذا القدر مكتوب ... مكتوب ما جاك = اصبر عسـى الله بالنهايـه ينجيـك
بديار ( بوشٍ ) سجنك الموحش هناك = ياليت لي قدره على الـدرب واجيـك
يا سجن ارفق مسندي وسط مبنـاك = ما شاف شمس ومظلمـات مبانيـك
مدري يا عمري كيف الأحوال ويّـاك = طمني عنـك طمـن امـك تحاتيـك
من يغسل اهدومك ومن قام يرعـاك = ومن يطبخ الوجبات منهو يواسيـك
ومنهو الذي بالليل لا نمـت غطـاك = خوفي عليك البـرد بالحيـل يوذيـك
ودي قبـل موتـي مشاهـد محيـاك = ودي أضمك فـي يدينـي وحاكيـك
يا حافـر قبـري دخيلـك رجينـاك = تحط فوق النصب نيشـان بوصيـك
يمكن يحين الوقـت ترجـع لمربـاك = وتزور قبري مسرع فـي خطاويـك
يا سيـدي سلطـان تكفـى طلبنـاك = يا راعي الفزعات تشكـر مساعيـك
شـلال طيـب منبعـه دوم يمنـاك = خيرك مغطي كـل بيـت باراضيـك
وقت الشدايد ما لها غيـر شـرواك = يبشر بعزه كل مـن جـاك ناصيـك
يـا سيـدي سلطـان حنـا فدايـاك = بارواحنـا نفديـك نفديـك نفـديـك
الجود وانت الجود يمشـي ببمشـاك = يمشي وراك ويتبعـك مـا يجاريـك
يتعبني مدحك لـو أعـدد سجايـاك = والشعر يرفـع رايتـه مـا يوفيـك
يالله عسى المولى يصونك ويرعـاك = ويعود نايف يـا عسـى الله يخليك
أبختصرها يا ذرى كـل مـن جـاك = شكوى تجيلـك تنتهـي مـا تعديـك