هذه القصيده موجهه من الشاعر مطر بن مهمل الشدادي الى اللواء
عبد الله الزبيدي (العميد سابقا) قائد لواء عمر بن الخطاب

ياابو ثامر بااشكي عليك الليال السود= وخل الليال البيض واحذر تقلبها

سنين مضت مااضنها ياعميد تعود= لها ذكريات وشوق وااسال مجربها

خدمنا الوطن في ظل حكامنا ال سعود=سلاطين نجد اللي رفيعه مناصبها

ملوك لها مجد تليد وريث جدود= يدرس لساسة جورج الاول ويكتبها

الا ياوطن بخدمك لو العمر محدود=واسكنك في عيني وظلك حواجبها

وغيري خدمك وكل ليث وراه اسود= ليا ثارت الهيجاء وهبت حرايبها

لواء عمر جاهز للقاء واشهب البارود=يقوده عميد تفتخر به كتايبها

سلايل شيوخ باعت الروح دون الذود= حروب لها تاريخ شبت شبايبها

وانا مامدحتك يالزبيدي بدون شهود=شهادة عرب والفرس والروم معجبها

وانا عسكري جندي وسلمتها لجنود= امانه وعند اشبال قامت بواجبها

وابسج رجلي كل ماذعذعن النود= وأزور الديار القفر وانزل شعايبها

وبرعا بذودي واكرم الضيف بالموجود= وبجلس مع النفس العنيده واعاتبها

الايازمن مريت عقد وراك عقود= وخليتني بين المحاله وجاذبها

وانا احسبك ماتقسى ولا اخذت من عهود= ولاتامن الدنيا ولو لان جانبها