قصيده اطول من بريم وسواميد=ان كان ماتصلح قصبنا رشانا
والمعرفه ماخذتها بالتقاصيد=اعاف هرياها واحب السمانا
نويت اوجه لي رساله في البريد=عنوانها بس الله المستعانا
واكتب عليها سلموها بيد عيد=اللي مشى في لازمي ماتوانا
رجل فهيم ومن خيار الاجاويد=ننصاه يومن الضروف اتحدانا
عند الطلب ماعقد البال تعقيد=لو كان نطلب من حلا له عطانا
والعد مايورد بليا مواريد=واليا وردنا به قطعنا ضمانا
وجا الخبر من يم صنات وسعيد=واليا سمعنا بالمسير بدانا
وقابلت ابو فوزي بليا مواعيد=عند الرجال مدلهين الحزانا
قالوا ذياب وقلت لا مثل ابو زيد=مع جيته جانا المطر يوم جانا
لو بمدحك تستاهل المدح ياعيد=والناس تعرف طيبنا من ردانا
على اسم ابن مسلط نسمي الاواليد=باعه طويل ولحية من لحانا
والا ترى بعض الاسامي تقاليد=كلن درى عنها وحنا درانا
اليا صفانا ناخذ الحق ونزيد=واليا تفرقنا خرب مستوانا
وحنا من اول مانحب لمقاعيد=واليا مشى شيخ القبيله مشانا
صدقانا اللي ماحدونا على الحيد=وعدونا اللي يعترض في نحانا
اما كسرنا شوكته بالبواريد=ولا على خده بالارجل وطانا
انا بغيت اشرح لك الوضع ياعيد=لنا طلب حساس مير استحانا
الورع يبكي والصبايا مراميد=لولا الحيا ياعيد معهم بكانا
عقب الغلا صارو ضعوف ومجاليد=كثرت مشاكلهم وفرحو عدانا
نبغى الذلول اللي قطع رجلها القيد=ان جبتها ياعيد نور سمانا
ياليد عبدالله وخالد مواجيد=ال السعد يااهل السعد ياحمانا
ورحم الله ابو فواز وطول الله في عمر ابو فوزي