إليا اعتزى حطاب قاموا الشدادين

بسم الله الرحمن الرحيم

أعزائي أعضاء منتديات الشدادين

السلام عليكم ورحمة الله وبركاته .. وكل عام وأنتم بخير

إليكم هذه القصيدة التي ألقيتها في حفل زواج الشاب : ذياب بن سفر بن داغان الحطابي

الذي أقيم في قاعة صدر المنصة بالرياض يوم الثلاثاء الموافق 5 / 10 / 1431هـ

واتمنى أن تنال اعجابكم واستحسانكم ..

يالله يا رب السماء والاراضين = يا خالق الانفس ومحصي عددها
يا خيّر ٍ يدعونك المستغيثين = ومن جودك المسنين تحيي بلدها
بأمرك تسوق إلهم مزون ٍ مغاشين = براقها يبرق ويرعد رعدها
وتصبح بها الدار السنيه بساتين = عقب الدهور اللي شكت من كمدها
يا رب عفوك يا مغيث المساكين = في ساعة ٍ روحي تفارق جسدها
وأرحم عبادك لا اقربن الموازين = وحسناتنا يا رب الارباب زدها
يا منزل ٍ طه وعم وياسين = ونعايمك مهوب يحصى مددها
يقول ابن مهرس بيوت ٍ مثامين = يقطف جزايلها وينقى جددها
ويصوغها صوغ الذهب في الدكاكين = من خوف نقاد الأدب تنتقدها
مثايل ٍ تعجب عقول الذهينين = ويفخر بها قصادها لا قصدها
ما كنها ألا در رثم العرانين = در الصعوب اللي صغير ٍ ولدها
ترعى بذوي حطاب بين الحفيفين = تجسر بهيبتهم وترتع وحدها
ومن دونها سموا الرماه الفواتين = ربع ٍ نهار الضيق يقدح زندها
وإن صاح صياح ٍ ورى النشر يا معين = وركبوا على السبّق وغارت جهدها
وثار العجاج وغطرفن المزايين = وراعي الذلول بعقب رجله لكدها
في دقلهم تشبع جياع السراحين = وكم شيخ قوم ٍ وسدوه بلحدها
الاد الحطيبي ملحقين المخلين = روس الرجال اللي قوي ٍ صمدها
واهل الكرم لاصار وجه الدهر شين = كم حايل ٍ للضيف جزوا عضدها
لا جوا أهل ركب ٍ من البعد عانين = شبوا لهم نار ٍ توقد وقدها
والكيف الاشقر والهلا والنباء الزين = وبيوتهم في الدهر يرفع عمدها
يا طيبهم طيباه ماهوب تخمين = ربع ٍ لنا من يوم بقعاء فمهدها
واليوم زان القاف عند الدواغين = عند الصقور اللي ينومس هددها
جينا نبارك يا ذياب ومهنيين = في ليلة ٍ زاد السعد من سعدها
وخوالنا لو كان عنا بعيدين = عاداتنا ما نختلف عن وعدها
وجتني هواجيسي من يسار ويمين = مثل الظوامي فوق بير ٍ تردها
وذكرت تاريخ الجدود القديمين = هل الفعول اللي صحيح ٍ سندها
يوم المثارى واصطفاق الاكاوين = هاك العصور اللي كثير ٍ نكدها
ناصر ومنصور الدهاه الشجيعين = عساهم بجنات عدن ورغدها
ناصر ليا ذل الردي بارد العين = كم سربة ٍ دون الخلايا طردها
ومنصور باتوع ٍ طليق الحجاجين = كبد ٍ يداويها وكبد ٍ لهدها
وفعولهم معروفة ٍ في الميادين = شهودها شرار وعايض شهدها
وحوقان يشهد والهضاب المزابين = ودهم الجموع اللي يروع حشدها
صبح صباح عجير بأم النياشين = وطابت عيون ٍ قد شكت من رمدها
يا وجد روحي لا ذكرت الدنادين = جداننا تفعل وحنا بعدها
وأليا اعتزى حطاب قاموا الشدادين = وقفة رفيق ٍ مع رفيقه حمدها
حقايق ٍ عندي عليها براهين = عيب ٍ على اللي في المحاضر جحدها
سموا بن الحارث هل الخف والقين = قبيلة ٍ في المجد ثابت وتدها
ربعي وربعي لا غدى العلم علمين = يحلحلون اللي صعاب ٍ عقدها
وباقي القبايل نعم ماهم خفيين = تعطي الحقوق ولا تخون بعهدها
واليوم في ظل الملوك السلاطين = آل السعود مزبنة من قصدها
إلهم ولانا من منول وذلحين = بيعة وفاء على الوفاء نعتمدها
تمت وصلى الله على ناشر الدين = وقال المثل من عز نفسه وجدها

فيصل بن مهرس

هلابك يافيصل وصح لسانك ملايين ولا يكفون

قصيده جميله من أول بيت إلى آخر بيت

سلمت يالذيب وعساها آخر الغيبات

ارحب ثم ارحب

يابن مهرس


قصيدة وافية من وافي لربع وافين


دائماً ما تبهرنا بأبداعك يا فيصل وليس مستغرب عليك هذا التألق



صح لسانك حتى ترضى

الله الله
يا شاعرنا الكبير أبو زايد
كفيت ووفيت وما قصرت
والله يبيض وجهك اليوم ودوم
وصح لسانك ملايين
ويستاهلون ربعنا الحطاطبة خاصة وبني الحارث
عامة المدح والثناء

صح لسانك ياابو مهرس

وافي ووالدك وافي وبيت طيب والطيب مايجي من نسلة الا طيب

والنعم بالمادح والممدوح

وانا اشهد ان الشدادين بأيام الوغى مايغيبون

شهادة حق لاأريد بها شكر من احد ولارياء لأحد

دمتم بخير

صح لسانك يابن مهرس وبيض الله وجهك على الجزلات ياجزل

أهلاً أهلاً


تغيب و لا تجينا غير بـ سمان الهرج و نلتزم الصمت لا شفنا الجزالة من راعي الجزلات


صح لسانك مدد بلا عدد


لآهنت يـ الأمير , جزآله لآ متناهيه من رآس أبن مهرس و لا هي غريبه عليه


يستاهلون ألآد الحطيبي



لآهنت



,

يقول ابن مهرس بيوت مثامين
يقطف جزايلها وينقي جددها
ويصوغها صوغ الذهب في الدكاكين
من خوف نقاد الادب ينتقدها
وانا اشهد يابن مهرس انها بيوت ثمينه من راس جزل وشاعر ينحت في صخر ويغرف من بحر شاعر تفخر القبيله اللى هو منها بامثاله والاد حطاب كفو وغانمين ويستاهلون كل علم غانم بيض الله وجهك وصح لسانك مليارات يامبدع
تقبل تحياتي,,,,

حي ذا العين يبو زايد

صح الله لسانك

كفوا ياربعنا والله يبيض وجهك

تقبل مرور اخوك

لا هنت يابن زايد على هالرائعة

جزل دوم ونتطلع لجديدك