الشوق يذبح والنوى يحرق الشوق للشاعر ناصر عبيد الرشيدي

الشوق يذبح والنوى يحرق الشوق

والليل ذكرى للقلوب العليله
والعشق عاشق يعشق احساس معشوق

يفهم شعوره كل يومٍ وليله
وأنا عشقت من المزايين غرنوق
أم العيون الناعسات الكحيله
فيها الحلا مصدر مميز وموثوق
اختصها الله بالصفات الجميله
عيون سود وعنق فارع ومنتوق
وخصرٍ نحيل وردف نابي تشيله
فوق الحلا طيبه وخفه ومنطوق
ورزه وأناقه وبالتعامل ثقيله
تمشي دلع بين المخاليق برفوق
من شافها ياويل حاله و ويله
حتى ليا منها بغت شي بالسوق
السوق كله يرتبك لو تجيله
كنت بنظرها غير عن كل مخلوق
انسان مامثله ولا احدٍ مثيله
تقول حبك فوق فوق السماء فوق
شامخ مدام إن الوفا أكبر دليله
وكانت تقول إن الغلا داخل الموق
محفوظ في عيني ولا احدٍ يزيله
وكانت تحملني مشاريه وحقوق
وإن غبت جابت علمي بأية وسيله
واليوم راحت منبع الحسن والذوق
فجأه تلاشى الحلم وعزم رحيله
الصبر زين وكل مطرود ملحوق
ولا لي مع الأقدار حيلٍ وحيله
أطوح الونه على كل طاروق
بيتٍ اشيله وبيت حزني يشيله
اشتقت لكن النوى يحرق الشوق
والليل ذكرى للقلوب العليله
وقلبي غدا من سبتة الشوق محروق
تحرقه ناره كل يومٍ وليله

قصيدة رائعة
مشكوره يالغالية
والله يعطيكِ العافية

تسلمين والله يا مشرفتنا الراقية
حنين
على هذا الاختيار الرائع والجميل
لهذه القصيدة المميزة
وصح لسان الشاعر الرشيدي ما قصّر

طرح رائع وجميل
اختيار موفق
يعطيك الف عافية

اسعدني جدا مروركم .
. ربي يعافيكم ويسعدكم
دمتم بالف خير ..