ابن ريفه

هذه قصيده مشهوره والقصيده لها قصه ،،
وهي لـــ فراج بن ريفه القرقاح القحطاني .
من قبيلة عبيدة قحطان ولأسباب ما جلا عن جماعته وقد أرسل لهم هذه القصيده ووجهها لأبن شفلوت يطلب منه أن ينهي الخلاف الحاصل
فيقول أبن ريفه :-

قال ابن ريفه بدا في المرقب العالي = واعلا المراقيب توميبه هبايبها
يا مرقبي جاك من الأسبار همالي = انصوب مزناً من المنشا يهل ابها
ما يدهله كون صافي الريش ولوالي = وألا الولع يوم يفنك في عجايبها
أنا ولد طارفه مانيب كسالي = اخاف من خبرةٍ باحت مزاهبها
عليك يا مرقبٍ جيته وانا سالي = هيض على القلب ديرانٍ شطيت ابها
هيض عليه شدوق الثفن لاسالي = عطفة طريب ليا زافت عجايبها
لا من غدا الفيض كنه زرع عمالي = سيله من القدم للبطنان ناهبها
كم مرةٍ قد نزلنا عشبه المالي = ببيوتنا لا وزا المجرم يلوذبها
ننزله ببيوت عرافاً وجهالي = وإن جا النذر من حفيفا مانزهبها
ربعي (( عبيده )) ليا جا هوشٍ وقتالي = هل هيةٍ في الضحى تشعا كسايبها
انشد عبيده هل الطولات من حالي = وانشد الاجانيب يوم انا نقربها
منهو يقلط على فرشاً وفنجالي = سعد ابن عمه ليا جاته مكاربها
لا من غدا بين نقاضٍ وفتالي = وصفت الأجانيب واذته بطلايبها
ثم جيتهم ثم لفحت بهم على الجالي = لفح الدلي للمعدي يوم يجذبها
ويا راكبٍ ميمونةٍ في مشيها ارمالي = ما يشتحن من هل العيرات راكبها
تزهي السفايف وتزهي الخرج وحبالي = ومجلربا لا سرى في الليل صالبها
ملفاك من يلبسون الجوخ والشالي = ربعي ودرعي وضد اللي يحاربها
ملفاك شيخ القبيله حامي التالي = عند (( ابن شفلوت )) يالمندوب قربها
قله عليَ طالت المده وانا جالي = عشر اسنوات مضت بحساب مقطبها
فإن كان ربعي نسوني مانيب غالي = باعيش في ديرةٍ قفرا جوانبها
في أيدي قرار تكف الجمع لا انهالي = طويله ناحلاً مقضب خشايبها
لي بندقٍ ما صنعها الصانع التالي = من دقة المارث ناحلةٍ مقاضبها
شريتها بالثمن يوم ارخص المالي = بميه وعشرين ما يمهل بغايبها
الله يرحمك يا عودٍ شرا هالي = من واحدٍ جابها للسوق جالبها
حديدها واذكر الله كنه اريالي = كن الحنايا تطوا في مقاضبها
اقف بها بين ربعي وامنع التالي = لاخاف ولد الردي ما احتال يزهبها
عط الطويله عريب الجد والخالي = ولد الردي لا تخلونه يزولبها
واللي رفيعٍ وللشوفات حمالي =ارفع نواصيه ياربي وقطبها
وانا من الخبره اللي شورهم عالي = واهل سلوك الردى يارب تذهبها
بنتٍ غرها زباد في يدين دلالي = والا طموحاً هواها من يلاعبها
كم مرةٍ قد ضربنا منهجاً خالي = وكم جملةٍ فرقتها من ربايبها
وليا لفونا من المقناص زعالي = احداً مدح بندقه واحداً يعذربها
بشرتهم بالعشا من عقب مقيالي = القايده مع مرد الكوع ضاربها
اضرب بها الوعل لا جاء له تهنفالي = ابوحنيفه كبير الراس شايبها
ذبحت عشره بها والضل ما مالي = والحاديه روحت تثلغ مضاربها
ويا الله انا طالبك حمراً هوا بالي = لا روح الجيش طفاحاً جوانبها
لا روح الجيش حاديه اشهب اللالي = لا هي تورد وسيعاً صدر راكبها
اللي على كورها واللي بالأحبالي = واللي على عيزها واللي بغاربها
لا روحت مع سباريت الخلا الخالي = كن الذيابه تنهش من ترايبها
تمت وصلوا عدد ما هل همالي = على نبي شروع الحق رتبها
اغفر ذنوب الفتى يا الله يا والي = لا جيت في حفرةٍ رزوا نصايبها

وتقبلوا تحياتي

مشكور ياضاوي على القصيده

الاكثر من راااااائعه وصح

لسان الشاعر اللي أبدع في القصيده

وهذه قصةالخلاف مع ..ابن هادي ..

نزح بقومه من تهامه إلىنجد واخذ مكانته وشهرته حتى تلقب أمير نجد وكان ابن هادي عاى علاقه وثيقه مع الحكام السعوديين في الدوريين الأول والثاني وقتل والده في مقدمة الجيوش السعودية في الحجاز ضمن الحملة التركيه المصرية بقيادة طوسون عــــ1226ـــام
وكان ابن هادي في ركب قاصدين ابن سعود ولم يمر النازحين من جماعته ظنا منه انهم سيعرفونه ويدعونه
اما هم قالوا ان قصدنا فالمحل محله وان تركنا فعلى رغبته ..فلحقه واحد منهم اسمه شذي ومعه فاطر ذبيحة له فقال ابن هادي هذه الابيات:

ياهل الركاب اللي خفاف المعاليق= ريضوا شوي واسمعوا لي علومي
سرحت من جنب على فكة الريق = وعز الله ان حقي عليهم لزومي
تكفون ياسمو العيال المطاليق= حتى العذارى زاهيات الرقومي
ما منكم اللي تلهن بالمخانيق= وانا ذراكم عن لهيب السمومي
الاشذي القوم زين المشافيق= اللي معرضنا بكوما ردومي
انا جملكم في نهار المساويق = ان جاء من العدوان خيفة علومي
اشيل من ربعي من الغيض ما اطيق= ولو انهم زعلين عندي حشومي
انا لربعي مثل حامي الاساويق= من دون ربعي مثل ضلع زمومي
نجد خذيته بالسلف والدفافيق= وخيل تعاقب مثل طابور رومي
والرزق عند الله بحظ وتوفيق = والعمر يفنى والليالي تدومي
اما جوير الفرد حامي المواثيق= اللي جوابه مثل صقع النجومي

وبهذا امتنع الفرد ولم يرد واجابه الجضعي من جماعتة شفلوت:

ياراكب وجنا تبوج المراهيق = كنه ظليم حاديته الخشومي
تنصى لنا شيخ دلاله على سيق = محمد ولد هادي مرد العلومي
يعطونه الاجناب قب ملاويق= وخذ الاصايل من الاحفة رسومي
جوابه اللي قال خلاني اضيق= والشيخ ما ياتي لربعه ظلومي

سامحوني على الغلط ان وجد ....

عبدالله مشكور على مرورك وتقبل تحياتي ،،،،

المستحيله مشكوره على تفاعلك وتقبلي تحياتي ،،،،

ترفع للاهمية

عافاك الله اخي العبيدي
لاول مرة اقراها واعرف تفاصيل القصة
جزاك الله كل خير والشكر موصول للمستحيلة

بيض الله وجهك يا ضاوي ولا هنت وأنا أخوك

هذي علوم الرياجيل وهذي سوالفهم اللي نطرب لها

تسلم يمينك

تسلم أخوي ضاوي على هذه القصص
الرائعه التي تذكرنا باأبطال فارقوا الحياة
لكن أفعلهم باقيه معنا ومع الاجيال القادمه

تسلم ياضاوي على هالقصه والقصيده بس عسى ابن شفلوت استقبله بعد القصيده .