مربع .. مثلث .. دائرة .. متعرج !!

بسم الله الرحمن الرحيم



قبل كم شهر حضرت دورة اسمها أنماط الشخصيات للأستاذ ياسر الحزيمي


المهم الدورة هدفها كيف نتعرف على شخصيات الناس اللي نتعامل معهم وطرق تفكيرهم


و قسم الناس لأصناف كثيرة ومن هالتقسيمات كان فيه تقسيم حلو نسيت اسم التقسيم بس أعجبني صراحه


وهالتقسيم قسم الناس لأربع أصناف وهي مثلث ومربع ودائري و متعرج


باختصار :



المثلث : هو الشخص اللي يحب يصدر أوامر ومتسلط ويحب استغلال اللي أمامه ينفع تحطه مدير أو قائد لأنه يعرف إمكانيات كل شخص ويحط كل شخص في مكانه المناسب .


المربع: شخص معقد يدقق على أدق التفاصيل يهتم بالوقت ويحب يكون كل شيء في مكانه و ما يعرف يخترع شي أو يبدع في شي لكن هو أفضل شخص تسلمه عمل لينهيه لأنه يطبق كل شيء بحذافيره و ما يعرف يقرر في الأوقات اللي تستدعي القرار السريع .

الدائري : هذا ما يعرف باسم الولد العاطفي و ولد خجول و يقدم مصلحة غيره على مصلحته و يتأثر بكلمات الإطراء و أي كلمه تزعله ,وحتى لو ما تزعل هالكلمه اصلا , يعني حساس .


المتعرج : هذا مشكلة بكبرها هذا ما يحب يمشي على الطريق المستقيم , يعني خارج النص وهذا مبدع و أفضل واحد يطلع بأفكار مجنونه , بس مشكلته إنه يمل بسرعه ويترك عمله في بدايته و يتجه لغيره , يعني أغلب مشاريعهم فاشله , السبب ليس سوء فكرة المشروع لكن لأنهم لا يستمرون في تنفيذ المشروع ( المتعرج عكس المربع ) .




أمثلة عشان تتضح الصورة :



يعني مثلا بتتغدون و تبون شي تشربونه مع الأكل وترسل أخوك اللي شخصيته مربع و تقول له جب لي ببسي يروح ويرجع ما يجيب لك شي , تسأله ليش و يقول ما لقيت ببسي , طيب ياخي جب كوكا كولا , جب سفن , جب أي غازيات , ما يعرف يتصرف إذا ما قلت له وش يسوي << بينما لو أرسلت المتعرج يمكن يجيب لك أسيد أو كلوركس إن خربت معه أهم حاجه يجيب شي يسلك .





تخيلوا لو فيه اختبار بتلقون المربع منضبط وجاي قبل الاختبار وجالس بالقاعه يتطقطقن أسنانه من الخوف .


عكس خوينا المتعرج اللي باقي يغني بحمام بيتهم وهو يتروش ولا على باله إذا فيه اختبار .



أما الدائره بتلقاه متأخر من الاختبار لأنه قابل ولد جارهم وهو طالع من البيت وراحت عليهم سوالف والدائره المسكين مستحي يقاطعه عشان يقول له عندي اختبار عن إذنك << ما قاطع ولد جارهم لأنه مستحي و وجهه مو قوي



والمثلث كمان متأخر عن الأختبار , ما هو لشي بس لأن خويه الدائرهـ ( نفسه اللي فوق ) اللي موصيه يمرهـ تأخر عليه وهو يسولف مع ولد جارهم .


طيب لو ركبوا سيارة هالاربع شخصيات وتشاوروا على وش يشغلون بالمسجل بتلقى المثلث بيشغل الشريط اللي يعجبه وما يسأل عن راي أخوياه أما الدائري ببيقول شغلو اللي يعجبكم و المربع بيقول أهم شي لا ترفعون الصوت وانتبهوا للطريق و المتعرج بيعطيهم رايه إذا رجع دخل للسيارةلأن الأخ طالع من شباك السيارة و يتلقف على الناس اللي بالشارع .




بأعطيكم أمثلة أكثر عشان توضح الصورة << خخخخخ


لو جينا على سيارة واحد من هالشخصيات الأربع, تتوقعونكيف بتكون سيارة كل واحد منهم .


المربع كل شيء في مكانه ومرتب , حتى قراطيس الوكاله باقي ما فكها , علماً بأن السياره صار لها عشر سنين معاه .


أما سيارة المتعرج ما راح تلقى مكان تقعد فيه من الحوسه هنا كتاب وهناك شماغ و شال النصر اللي يحضر فيه المباراة معلقه بالمراية ويمكن تتهور وتجلس وتلقاك جلست على نظارته و كسرتها ,, << يعني الحالة يرثى لها


أما سيارة الدائرة بتحس إنك داخل غرفة نوم ما هو بسيارة من الدباديب اللي فيها والقلوب الحمراء ومن هالسوالف .


أما المثلث بنتكلم على سيارته إذا كانت معه أصلا لانك بتلقاه ماخذ سيارة أخوه من كثر ما هو استغلالي .



الموهم يا أخوان إني حضرت هالدوره أنا ومجموعه من إخوياي , وبنص الدورة ومن كثر ما هي مفيدة عرفت شخصيات بعض الناس اللي أعرفهم وصرت أرسل لأخوياي اللي حاضرين معي الدورة رسايل (فلان طلع مربع ) وعلى هالمنوال , و صار كل واحد من الشباب يكتشف شخصية الثاني .


وبعد ما خلصنا الدورة غيرنا بعض أسامي الشباب اللي بجوالاتنا , وصرنا نخزن أسمائهم على حسب شخصياتهم ( مثلث , مربع , ... ) .



يعني تلقى جوال أي واحد فينا يتصل ومكتوب فيه ( المربع يتصل بكـ ) أو ( دويرهـ يتصل بكـ ) أو ( مطعوج يتصل بكـ ) << ههههههههه



إضافة :

الدورة كانت مفيدة لأني صرت أميز أغلب شخصيات الناس , وصرت أتحمل تصرفاتهم لأني عرفت إن هاذي اصلا شخصياتهم , وكمان صرت أحاول إني أخذ الصفات الحلوه من كل شخصية , وأضيفها لشخصيتي عشان تتطور ..


اتمنى أنكم استفدتوا من الشئ اللي أنا استفدته و إذا عندكم إضافات أو تعليقاتكم على الشخصيات , لا تستحون ترى الموضوع موضوعكم ,

و الله يسامح غالية << ثلاث مواضيع يالظالمة مرة وحده هههههههه

اعتذر على الإطالة ,,

عادل الحارثي ,,

بصراحة موضوع في غاية الروعة

ومثل هذه الدورات تكشف لك بعض الأمور

المفيده والمهمه بحياتنا ,,,,

شكرا اخوي عادل على هذا الموضوع الرائع

بس عندي سؤال لك اخوي عادل

وش طلعت شخصيتك انت,,,,

دمت بخير وراح نطبع على الزملاء والاصدقاء

هذه النظرية,,,,,,,

ذكرتني بدورة عن الخطوط,,,,كيف تعرف نفسية الواحد من خطه,,,,

وكمان بعض من شخصيته,,,

الله يعطيك العافية

بصراحة موضوع مفيد

قدرت اكتشف شخصيات كثيرة
لكن للاسف اغلبها طلعت المثلث

عادل الحارثي
شكرا لك على هذا الطرح الجميل

^
^

وشسمه قد مره حضرت محاضره بجامعة الاميره نوره وكانت المحاضره لعلم أسمه العلم الجرافولوجي >> عسى الاسم صح

واللي اكتشفه طبيب ايطالي كان استاذ فلسفه في جامعه بولونيا بألمانيا وهو نوع من علم الفراسه اللي مختصه بتحليل الشخصيه طبعاً هالعالم اكتشف تحليل الخط باللغه اليونانيه لكن اللي أسس علم الجرافولوجي لكن باللغه العربيه كان الدكتور فؤاد عطية

هالعلم يبحث في تحليل شامل للشخصية فهو يكشف لك شخصيتك الحقيقية و شخصيات الآخرين وهو لفهم الناس ليس للحكم عليهم
وهذي نقطه مهمه لانه في كثير من الناس نقول احنا مو فاهمين كيف نتعامل
معهم فمن هالباب ندخل لهم

طيب نروح عالاشكال

		المشاركة الأصلية بواسطة : اقتباس
	الدائري : هذا ما يعرف باسم الولد العاطفي و ولد خجول و يقدم مصلحة غيره على مصلحته و يتأثر بكلمات الإطراء و أي كلمه تزعله ,وحتى لو ما تزعل هالكلمه اصلا , يعني حساس .

ويقولون بعد أنه يحب يكرر الكلام


>> فيس يحييّ الدائريين

		المشاركة الأصلية بواسطة : اقتباس
	المربع: شخص معقد يدقق على أدق التفاصيل يهتم بالوقت ويحب يكون كل شيء في مكانه و ما يعرف يخترع شي أو يبدع في شي لكن هو أفضل شخص تسلمه عمل لينهيه لأنه يطبق كل شيء بحذافيره و ما يعرف يقرر في الأوقات اللي تستدعي القرار السريع .

ويقولون أنه مايحب النزاعات وأذا سألته قالك أنا مالي شغل

		المشاركة الأصلية بواسطة : اقتباس
	المثلث : هو الشخص اللي يحب يصدر أوامر ومتسلط ويحب استغلال اللي أمامه ينفع تحطه مدير أو قائد لأنه يعرف إمكانيات كل شخص ويحط كل شخص في مكانه المناسب .

ويقولون أنه يحب زبدة الكلام

يعني مايحب الهذره الزايده



موضوع حلو عادل اهتمَ بهالعلم كثيرَ بغض النظر عن مدَى صحتَه ! الا آنّي دايم ألقى نفسِي آدوّر فيه .. لأنْ أغلب الصفَات تنطبق علَي


يعطيك العافيه ..

		المشاركة الأصلية بواسطة : اقتباس
	و الله يسامح غالية << ثلاث مواضيع يالظالمة مرة وحده هههههههه

الله يفك أسرك عاجلا غير آجل

ماعليه تغيير جو

		المشاركة الأصلية بواسطة : نايف بن شداد اقتباس
	بس عندي سؤال لك اخوي عادل وش طلعت شخصيتك انت

مرحبا كثر مالك منزلة بالقلب


تقصد وش مسميني أصدقائي بجوالااااتهم ؟؟


طيب علمني انت وش طلعت و أنا أعلمك


خلاص خلاص بعلمك


أنا مسميني متعرج

بس اعتقد إني متعرج تربيع


لأني أحس إني مربع في أمور الدراسة بس


يعطيك العافية اخوي نايف ع تواجدك الرائع

		المشاركة الأصلية بواسطة : النايفة اقتباس
	لكن للاسف اغلبها طلعت المثلث

أما أغلبهم مثلث ههههههههههههههههههههه << هالعضو يضحك شماتة


أجل الله يعينك عليهم شكلهم مستغلينك و انت الضعيفه تسمعين كلامهم



تدرين خليك مثلث زيهم وكملي الرصّة


يعطيك العافية ع تواجدك القميل

		المشاركة الأصلية بواسطة : اقتباس
	هالعالم اكتشف تحليل الخط باللغه اليونانيه لكن اللي أسس علم الجرافولوجي لكن باللغه العربيه كان الدكتور فؤاد عطية

بيني و بينك أنا سويت هالاختبار قبل أربع سنوات تقريبا بس و الله نسيت اسم الدكتور

قالي انسخ نفس الكلام اللي بالجريدة بورقة خارجية بنفس خطك المعتاد


المهم أخذ الورقة مني و قال بكرة بعطيك النتيجة

اليوم اللي بعده كتب لي في ظهر الورقة بعض الصفات اللي استنتجها و من ضمنها هالصفة اللي صراحة احسها فيني

قال ( انت إذا كلفك أحد بشغل تسويه له بس بعد ما تجيب له المرض يعني بعد فترة )

قلت شلون استنتجت هالشيئ قال أنت لما تكتب حرف ( الألف ) تنتظر لين تنهي الجملة بعدين تحط ( الهمزة ) فوق الألف << خخخخخ عليه شطحات هالدكتور




شغب إضافاتك حلوة , وشكلك مصاحبه هالنوعيات و متأثرة فيهم


عالطاري أنت وش طلعت منهم << عطينا أقرب واحد


يعطيك العافية ع تواجدك

يعطيك ربي ألف عافيه على موضوعك الأكثر من رائع ،،
وبالنسبه لمعرفة الشخصيه ومعرفة انماطها وسماتها فهي بحد ذاتها علم،، وكثير من الناس يجهلون هذا العلم ،،

وبالنسبه لشخصيتي أحس كثيير أنها تميل للنمط الدائري وفيها كمان من النمط المتعرج ،،

موضوووووووووووعك ياعادل شاقول عنه
من جد عجبني كثير واستفدت منه باالصراحة
اما الي طلعلي بصراحه امممممممممم<<<<<< المربع انا كثيرررررررر
احب ادقق الكل يقولي هههههههه
بس عاد مو اني ماعرف اختراع او ابدع
يمكن اختراع ايه ماعرف اختراع بس ابداع فيني
يعني احب ابدع في الاكسسورات تجيني افكار
من عندي واضيفها
هذا يسمى ابداع
على كل حال مشكور وماتقصر بصراحة استفدت كثيرررر
اتمنى تزيد من هذي الدروس لانه بصراحة عجبني الدرس
وشكرا ياعادل

الله يسعدك دنيا وآخره
أضحكتني


انا خليط من هالأربعه كلهم
وش يطلع نوعي بالاخر



طرح جدا رائع
ربي يوفقك