تويتات 140 - 2

الملف الشخصي للكاتب · توقيع : فهد سفر

صباح الخير جميعاً ...
بياض وجه الصبح ← فيه التباشير
وأول تباشير الصبح → طلّة الشمس
كنه يقول لسارحه .. أبشر بخير
وجهاتك الأربع معي أصبحت خمس
※ ※ ※ ※
على الطريق الشين لا تحتريني
لو شفت من غيري رداه وخماجه
إسلم .. وسلم لي على الطيبيني
راحوا ولا خلّوا من الطيب حاجه
※ ※ ※ ※
معوض خير ياقلب ٍ لقى من كـــثـرة التــهمــيش
كثر ما عدّ خلق الله (ابن عم وأخ صــــاحـــب)
بسيطٍ ماعرف يآخذ على خدمة بشر بخـشيـش
وفاء لكن لقى وجه الوفا مع هالبشر شــاحـــب
※ ※ ※ ※
تقهوى عيوني يالسهر لايجيها نعاس
أخاف المنام يجيب لي صورة الغالي
وأنا والله إني له قد أسهبت فالإحساس
ولا كنت أظن إني بعّود على حالي
※ ※ ※ ※
والله إني لا تعبت ، ولا إنثنيت
وكل درب ٍدرهمت فيه القدم
مالقيت أوفا من الصبر إن بلِيت
(لا خلا من وقفته .. ولا عدم)
※ ※ ※ ※
تهامل دموع العين من ضيقتي مدرار
ولا ودي أذخر من دموعي ولا دمعه
على طيبين الذكر لا مرت الأفكار
وطرالي زمان فيه الاجواد مجتمعه
※ ※ ※ ※
من داخل أسوار الظلام .. وواقع ٍ مرٍّ كئيب
أرفع كفوفي للسماء ، يالله رضاك ومغفرتك
الصمت ماكفّ القدر ، والحلم ماجاب النصيب
والحظ جلاّب الشقا .. والناس ماهي بمعِذرتك
※ ※ ※ ※
أنا إياي ياسود الليالي وأببقى إياي
ولو صدّوا الأقراب وأرخصني أصحابي
أنا في رجا الله خالقي ربي ومولاي
ولا لي ورى خلقه مطاليب وحسابي
فهد سفر