قصيده وردها

هذه القصيده ارسلتها للشاعر الكبير بسيس بين حديد الشدادي

رحمه الله ورد عليها

ياراكبٍ موديلها تو مافان=تسعين ورد من ديارٍ بعيده
موردٍ بالين ما هو بتعبان=واليا مشيت ابني بيوت القصيده
تشرح ضميري ياهل الراي والشان=واليا انشرح بالي يجيب المفيده
وتلفي لابو فواز ذباح للضان=وراعي دلالٍ في محله عديده
وابوك سفر مبرهنٍ كل برهان=من خلقته جاب العلوم الرشيده
حدايده في الراي صلبين ورزان=مثل السيوف المرهفات الحديده
رجال شجعانٍ من الاد قطمان=من جدهم جابوا علومٍ حميده
وشيخ القبيله علي للحق ميزان=ابن الشيوخ اللي علومه مجيده
دمشق واخوه قطيم للعلم برهان=والكل منهم واقفٍ مع عضيده
واطرب ليا مني لفيت اهل الالحان=بسيس لا عدد علوم ونشيده
ليته يخاويني على جمس بطران=وان خلي اليابان يقعد قعيده
واخذ علومك يابن حديد وشفقان=واشفق على البيت الثمين ورديده
ونزور مكه زور يا رب غفران=تغفر ذنوب اللي ذنوبه شديده
وارجعه يم الشرايع على شان=نخطب له الجادل بسنه وكيده
وان وافقوا نشري ذهب غالي الاثمان=ونعبي كروت العزيمه حميده
هذا كلامٍ قايله قول عجلان=ويا بسيس ابن سفر الحديد تزيده
وصلاةً ربي عد ما هب هبان=على النبي عداد كتب الجريده

رد بسيس بن حديد

يالله يامطلوب ترجع بالاوطان=وتجعل لنا عندك حياةٍ سعيده
جاني من الطيب تماثيل وألحان=يامرحبا وان زاده الله نزيده
يابن علي والعم مسلط وسلطان=ومشعل لو انه في ديارٍ بعيده
وعويض ابن فهيد يا طير حوران=رجلٍ من اهل الخير والله يزيده
ونعمٍ بابو هندي ولاني بغلطان=وأبو طراخم حي ذاك الوليده
يا طيبهم فوق الركاب ام الارسان=واليوم كلٍ راكبٍ له حديده
حنا جماعه كلنا ربع واخوان=الجد واحد واصلنا من عبيده
سويت لي قافٍ على زين ما زان=وامشي مع الطيب على مايريده
ما كنها الا در حلوات الالبان=والا عسل عيسان واشعاب بيده
ما ناخذ الا ثمر من روس الاغصان=وابغى عويض ينشره في الجريده
والرجل لا صابه صواديف واحزان=يصبر ترى كثر البكاء مايفيده
ومن ياخذ اليابان في البعد خسران=زيته يبيح وكل ساعه يزيده
سيارةٍ تصلح لحرمه وورعان=وان دقها الصدام راحت عصيده
والجمس مشهاتي مع طوال الايمان=يفز له قلبي ربيعه وعيده
جمسٍ جديد يطير من غير جنحان=طاره هوى والياء اشتغل ذب سيده
واليا ركبنا وابتعد كل شيطان=مر الغروس اللي تمايل جريده
وان كان في طلب الرجاء ما انقضى شان=نصبر سوات العبد في حكم سيده

بيض الله وجهك على هالقصائدة الرااائعه

والمساجله الجميله

ونتمنى نشوف المزيد من قصائدك هنا

صح لسانك وبيض الله وجهك
والله يرحم بسيس بن حديد
وتقبل تحياتي

بيض الله وجهك على هالقصائدة الرااائعه
والله يرحم بسيس بن حديد

الله الله يا ابن علي

أخيراً تتواصل معنا بروائعك وجميل قصائدك ....

بيض الله وجهك ولا هنت ورحم الله شاعرنا الكبير

بسيس بن حديد الشدادي وأدخله فسيح جناته

صح لسانك يابو علي وبيض الله وجهك

على القصيده الجزله وردها الجزل

من الشاعر الكبير بسيس بن حديد

والله يرحمه ويسكنه فسيح جناته

صح لسانك

يا بوعلي

ورحم الله الشاعر بسيس

وبيض الله وجيهكم والله لا يهينكم

صح لسانك يا أبو علي
ورحم الله الشاعر الكبير بسيس بن حديد
مساجلة ولا أحلى

صح لسانك ياعويض

وصح لسان الشعار الكبير بسيس ابن حديد

اشهد اني من المعجبين في قصائده ..

رديه جزله بين شاعرين مميزين ..

تحياتي وأحترامي

عويض علي بسيس حديد


بيض الله وجيهكم

وما قصرتوووووا


قصائد جزله من شعراء جزلين


وكل عام وانتم بخير